ट्रम्पद्वारा इरानसँग अर्को साता थप वार्ता हुने घोषणा

अमेरिकी राष्ट्रपति डोनाल्ड ट्रम्पले शुक्रवार आफ्नो प्रशासनले अर्को हप्ताको शुरुमा इरानसँग थप वार्ता गर्ने जानकारी दिनुभएको छ । ओमानमा इरानसँग भएको धेरै राम्रो अप्रत्यक्ष संवादको केही घण्टापछि ट्रम्पले यस्तो घोषणा गर्नुभएको हो ।

फ्लोरिडाको मार–ए–लागो क्लवतर्फ जाँदै गर्दा एयर फोर्स वनमा पत्रकारहरूसँग कुरा गर्दै ट्रम्पले आफूहरुले इरानको बारेमा धेरै राम्रो कुराकानी गरेको बताउनु भयो । सम्झौता कस्तो हुन्छ भनेर हेर्नुपर्ने तर इरान सम्झौता गर्न धेरै इच्छुक देखिएको बताउनुभयो।

उहाँले अर्को हप्ता पुनः भेट्ने योजना रहेको बताउँदै यदि इरानले आफ्नो आणविक कार्यक्रमका बारेमा सम्झौता गर्न असफल भएमा त्यसको परिणाम निकै गम्भीर हुने चेतावनी दिनुभयो । ट्रम्पले सो क्षेत्रमा अमेरिकी नौसेनाको ठूलो युद्धपोतको समूह गइरहेको र चाँडै पुग्ने समेत उल्लेख गर्नुभयो ।

स्थानीय सञ्चारमाध्यमकाअनुसार ओमानमा भएको उक्त वार्तामा अमेरिकी राष्ट्रपतिका विशेष दूत स्टिभ विटकफ, ट्रम्पका ज्वाइँ जारेड कुश्नर र अमेरिकी सेन्ट्रल कमाण्डका कमाण्डर एडमिरल ब्राड कुपर सहभागी थिए ।