लेबनानले शनिवारदेखि ३ सय सजाय पाएका सिरियाली कैदीहरूलाई स्वदेश फिर्ता गर्ने

लेबनान र सिरियाले शुक्रवार बेरुतमा लेबनानी जेलहरूबाट सजाय पाएका सिरियाली कैदीहरूलाई सिरियामा स्थानान्तरण गर्ने सम्झौतामा हस्ताक्षर गरेका छन् । लेबनानको आधिकारिक राष्ट्रिय समाचार एजेन्सीकाअनुसार यो सम्झौता शनिवार बिहानदेखि लागू हुनेछ र शुरुमा करिव ३ सय कैदीहरूलाई समेटिनेछ ।

वरिष्ठ लेबनानी अधिकारीहरू र न्याय अधिकारी प्रमुख मजहर अल–वाइस सहितको सिरियाली प्रतिनिधिमण्डलले यस ऐतिहासिक सम्झौतामा सहमति जनाएका हुन् । लेबनानी उपप्रधानमन्त्री तारिक मित्रीकाअनुसार यो स्थानान्तरण ती कैदीहरूमा मात्र लागू हुन्छ जसले पहिले नै १० वर्ष भन्दा बढी जेल सजाय काटिसकेका छन् ।

यसमा कुनै अपवाद हुनेछैन । सम्झौतामा नपरेका थुनुवाहरूको अवस्थालाई सम्बोधन गर्न छुट्टै कानूनी प्रक्रिया अगाडि बढाइने एजेन्सीले जनाएको छ ।