अफ्रिकामा हतियारहरू मौन राख्नु अझै पनि चुनौतीः एयूसी प्रमुख

अफ्रिकी संघ आयोगका अध्यक्ष महमुद अली युसुफले महाद्वीपका विभिन्न भागहरूमा शान्ति र सुरक्षाका खतराहरूलाई सम्बोधन गर्न अफ्रिकाको असमर्थताप्रति चिन्ता व्यक्त गर्नुभएको छ । इथियोपियाको राजधानी अदिस अबाबास्थित एयू मुख्यालयमा शनिवार र आईतवार सञ्चालन भइरहेको एयूको राज्य तथा सरकार प्रमुखहरूको ३९ औँ साधारण सत्रको उद्घाटन सत्रमा एयूसी प्रमुखले यस्तो टिप्पणी गर्नुभएको हो ।

धेरै अफ्रिकी देशहरूको राजनीतिक र संस्थागत कमजोरीलाई महाद्वीपीय चिन्ताको स्रोतको रूपमा स्वीकार गर्दै उहाँले खुला र लुकेका द्वन्द्वहरू दीर्घकालीन बनिरहेको बताउनु भयो । सुडान, पूर्वी प्रजातान्त्रिक गणतन्त्र कङ्गो र सोमालिया लगायतका क्षेत्रको अवस्थालाई चित्रण गर्दै युसुफले जनताले अस्थिरताको लागि ठूलो मूल्य चुकाइरहेको बताउनु भयो । ५५ सदस्यीय महाद्वीपीय संस्थाका अध्यक्षले अन्तर्राष्ट्रिय व्यवस्थामा हालैको उथलपुथलले निश्चित रूपमा महाद्वीपको मामिलामा ठूलो प्रभाव पारिरहेको उल्लेख गर्नुभयो ।

एकपक्षीयता र संरक्षणवादको उदयसँगै बहुपक्षीयताको कडा परीक्षण भइरहेको उल्लेख गर्दै उहाँले वाह्य धक्काहरूको सामना गर्न अफ्रिकाले आफ्नो महाद्वीपीय एकतालाई सुदृढ गर्न आवश्यक रहेको बताउनु भयो ।