अमेरिकाले नियन्त्रणमा लियो हिन्द महासागरको भेनेजुएलाको तेल ट्याङ्कर

पेन्टागनले आईतवार जानकारी दिएअनुसार अमेरिकी सेनाले रातभरको कारबाहीमा हिन्द महासागरमा भेनेजुएलासँग सम्बन्धित अर्को तेल ट्याङ्करलाई नियन्त्रणमा लिएर त्यसमा खानतलासी गरेको छ । ‘वेरोनिका ३’ नामको उक्त जहाजलाई क्यारिबियन सागरदेखि हिन्द महासागरसम्म अमेरिकी अधिकारीहरूले पिछा गरेका थिए र अन्ततः त्यसलाई रोकेर निरीक्षण गरिएको पेन्टागनले सामाजिक सञ्जाल ‘एक्स’ मार्फत जारी गरेको विज्ञप्तिमा जनाएको छ ।

जहाज ट्र्याकिङ र सामुन्द्रिक तथ्याङ्क वेबसाइटहरूले वेरोनिका ३ लाई पानामाको झण्डा भएको तेल ट्याङ्करका रूपमा पहिचान गरेका छन् । ठीक एक हप्ताअघि पनि अमेरिकी सेनाले भेनेजुएलासँग सम्बन्धित ’एक्विला २’नामको तेल ट्याङ्करलाई क्यारिबियनबाट पिछा गर्दै हिन्द महासागरमा नियन्त्रणमा लिएको थियो ।

अमेरिकी राष्ट्रपति डोनाल्ड ट्रम्पले डिसेम्बरमा भेनेजुएला प्रवेश गर्ने वा बाहिरिने सबै अमेरिकी प्रतिवन्धित तेल ट्याङ्करहरूमाथि ‘पूर्ण नाकाबन्दी’ को आदेश दिएका थिए । जनवरी ३ मा भेनेजुएलाका राष्ट्रपति निकोलस मादुरोलाई अमेरिकी छापा र गिरफ्तारीपछि पनि यो नाकाबन्दी जारी रहेको छ ।