प्रतिनिधिसभा निर्वाचनमा २ लाख १५ हजार कर्मचारी परिचालन हुने

काठमाडौँ। निर्वाचन आयोगका सचिव कृष्णबहादुर राउतले प्रतिनिधिसभा निर्वाचनलाई स्वच्छ, निष्पक्ष र विश्वसनीय वातावरणमा सम्पन्न गर्न आयोग पूर्ण रूपमा तयार रहेको बताउनुभएको छ।

निर्वाचनलाई सुरक्षित र व्यवस्थित बनाउन २ लाख १५ हजार कर्मचारी परिचालन गरिएको सचिव राउतले जानकारी दिनुभयो।

कूटनीतिक समुदायका लागि आयोजित विशेष ब्रिफिङ कार्यक्रममा उनले निर्वाचनका सम्पूर्ण व्यवस्थापकीय काम अन्तिम चरणमा पुगेको जानकारी दिनुभयो।

सचिव राउतकाअनुसार यस निर्वाचनमा कुल १ करोड ७९ लाख मतदाता सहभागी हुँदै छन्। जसमा ४९ प्रतिशत महिला र ५१ प्रतिशत पुरुष रहेका छन्।

मतदानका लागि देशभर १० हजार ९६७ मतदान स्थल र २३ हजार ११२ मतदान केन्द्र तोकिएका छन्। साथै अस्थायी मतदाताका लागि समानुपातिक निर्वाचन प्रणालीतर्फ मतदान गर्न १४३ वटा अस्थायी मतदान केन्द्र व्यवस्था गरिएको छ।

निर्वाचन आचारसंहिता पालना गराउन जिल्ला स्तरमा अनुगमन समिति र मुख्य निर्वाचन अधिकृतहरूको नेतृत्वमा टोली सक्रिय रहेका छन्।

मतदाता शिक्षालाई प्रभावकारी बनाउन र बदर मत घटाउन ६ हजार ७४३ वडास्तरीय स्वयंसेवकहरू १५ दिनका लागि परिचालन गरिएका छन्।