भारतमा हवाई टिकट काटेको ४८ घण्टाभित्र रद्द गर्दा शुल्क नलाग्ने, यस्ता छन् नयाँ नियम

काठमाडौं । भारतको नागरिक उड्डयन नियामक निकाय (डिजीसीए)ले हवाई टिकट फिर्ता र रद्दसम्बन्धी नियममा यात्रुहरूको हितमा महत्त्वपूर्ण परिवर्तन गरेको छ। फेब्रुअरी २४ मा जारी संशोधित नियम चालु वर्षको मार्च २६ देखि लागू हुनेछ।

नयाँ व्यवस्थाअन्तर्गत एयरलाइन्सहरूले टिकट बुक गरेको ४८ घण्टाको अनिवार्य ‘लुक-इन’ अवधि प्रदान गर्नुपर्नेछ। यस अवधिमा यात्रुहरू थप शुल्कबिना आफ्नो टिकट रद्द वा परिवर्तन गर्न सक्नेछन्। तर यो सुविधा केही शर्तहरूमा मात्र लागू हुनेछ।

घरेलु उडानका लागि प्रस्थान मिति बुकिङको कम्तीमा सात दिन र अन्तर्राष्ट्रिय उडानका लागि कम्तीमा १५ दिन टाढा हुनुपर्नेछ। यो सुविधा एयरलाइन्सको आधिकारिक वेबसाइटबाट किनेको टिकटमा मात्र उपलब्ध हुनेछ। यदि यात्रुले अर्को उडानमा परिवर्तन गरेमा भाडाको अन्तर भने तिर्नुपर्नेछ।

नाम सच्याउने विषयमा पनि नयाँ व्यवस्था छ। एयरलाइन्सले बुकिङको २४ घण्टाभित्र यात्रुले आफैँले औँल्याएको नाम सच्याउन थप शुल्क लिन पाउँदैन — तर यो सुविधा एयरलाइन्सको आधिकारिक वेबसाइटबाट किनेको टिकटमा मात्र लागू हुन्छ।

रिफन्ड प्रक्रियाका हकमा क्रेडिट कार्डमार्फत गरिएको भुक्तानी सात दिनभित्र र एयरलाइन्सको काउन्टरमा नगदमा गरिएको भुक्तानी तत्कालै फिर्ता गर्नुपर्नेछ। ट्राभल एजेन्ट वा अनलाइन पोर्टलमार्फत टिकट किनेको भए पनि रिफन्डको जिम्मेवारी एयरलाइन्सकै रहनेछ र उनीहरूले १४ कार्यदिनभित्र प्रक्रिया पूरा गर्नुपर्नेछ।

चिकित्सा आपतकालको हकमा पनि छुट्टै व्यवस्था गरिएको छ। एउटै बुकिङमा रहेका यात्रु वा परिवारको सदस्य यात्राको अवधिमा अस्पताल भर्ना भएमा एयरलाइन्सले पूर्ण रिफन्ड वा भविष्यको यात्राका लागि क्रेडिट शेल प्रदान गर्न सक्नेछ।

यो परिवर्तन रिफन्ड ढिलाइसम्बन्धी बढ्दो उजुरीको पृष्ठभूमिमा आएको हो। डिसेम्बर २०२५ मा इन्डिगो एयरलाइन्सको उडान अवरोधका क्रममा रिफन्ड ढिलाइको मुद्दा चर्किएको थियो। त्यसपछि नागरिक उड्डयन मन्त्रालयले एयरलाइन्सलाई निश्चित समयसीमाभित्र रिफन्ड प्रक्रिया पूरा गर्न निर्देशन दिएको थियो।