औद्योगिक रूपान्तरणमा केन्द्रित अफ्रिका इनर्जी इन्डाबा २०२६ केप टाउनमा शुरु

ऊर्जा सुधार, पूर्वाधार विस्तार र क्षेत्रीय एकीकरणमार्फत अफ्रिकाको औद्योगिक रूपान्तरणलाई अघि बढाउने उद्देश्यका साथ मंगलवार दक्षिण अफ्रिकाको केप टाउनमा ‘अफ्रिका इनर्जी इन्डाबा २०२६’ शुरु भएको छ ।

‘इग्नाइटिङ द पावर रिभोल्युसन’ /विद्युत क्रान्ति प्रज्वलन भन्ने नाराका साथ आयोजित यस १८ औं संस्करण आगामी बिहीवारसम्म केप टाउन अन्तर्राष्ट्रिय सम्मेलन केन्द्रमा सञ्चालन हुनेछ । यस कार्यक्रममा उपयोगिता सेवा प्रदायक, नियामक, लगानीकर्ता र उद्योगका कार्यकारीहरू परियोजना कार्यान्वयन र लगानी परिचालनका लागि एकै ठाउँमा भेला भएका छन् ।

सम्मेलनको मुख्य एजेन्डामा क्षेत्रीय विद्युत बजार सुदृढीकरण, सीमापार व्यापार, ग्यास–टु–पावर विकास, प्रशारण तथा ग्रिड विस्तार र निजी पुँजी परिचालन जस्ता विषयहरू रहेका छन् । आयोजकका अनुसार यस पटक ३७ अफ्रिकी देशका १,६६२ प्रतिनिधिहरू सहभागी छन् । जसमा १५ अफ्रिकी ऊर्जा मन्त्री र १७३ विज्ञ वक्ताहरू समावेश छन् ।

मुख्य सम्मेलनसँगै आयोजित प्रदर्शनीमा १०० भन्दा बढी स्टलहरू मार्फत ग्यास, नवीकरणीय ऊर्जा, आणविक शक्ति, प्रसारण र इलेक्ट्रिक मोबिलिटीका क्षेत्रमा भएका अत्याधुनिक प्रविधिहरू प्रदर्शन गरिएको छ । यस प्रदर्शनीमा ४,३०० भन्दा बढी आगन्तुकहरूले अवलोकन गर्ने अपेक्षा गरिएको छ भने ग्रामीण ऊर्जा पहुँच र शहरीकरणको माग सम्बोधन गर्ने समाधानहरूलाई पनि प्राथमिकता दिइएको छ ।