अमेरिकी–इजरायली ‘आक्रमण’ रोक्नु नै युद्ध अन्त्य गर्ने एकमात्र उपायः इरान

इरानी विदेश मन्त्रालयका प्रवक्ता इस्माइल बाघेईले मंगलवार इरानविरुद्धको अमेरिकी र इजरायली ‘आक्रमण’ रोक्नु नै युद्ध अन्त्य गर्ने एकमात्र उपाय भएको बताउनुभएको छ ।

हालैका अमेरिकी र इजरायली आक्रमणबाट क्षतिग्रस्त भएको तेहरानस्थित एउटा विद्यालयमा आयोजित साप्ताहिक पत्रकार सम्मेलनमा उहाँले युद्ध अन्त्यका लागि इरानका पूर्वशर्तहरूका बारेमा टिप्पणी गर्दै यस्तो धारणा राख्नुभएको हो । उहाँले इरानको कुटनीतिक संयन्त्रले सरकारको समर्थनमा कूटनीतिको बाटो पछ्याएको र युद्ध टार्न अन्तिम क्षणसम्म सक्दो प्रयास गरेको भएपनि अर्को पक्षले युद्ध शुरु गर्ने निर्णय गरेको बताउनुभयो ।

बाघेईले पश्चिम एशिया क्षेत्रमा युद्धको दायरा विस्तार हुनुभन्दा अगाडि नै अन्तर्राष्ट्रिय समुदायले समयमै उचित निर्णय लिनुपर्नेमा जोड दिनुभयो । केही अरब राष्ट्रहरूले अमेरिकासँग मिलेर इरान विरोधी गठबन्धन बनाउन सक्ने सम्भावनाको बारेमा सोधिएको प्रश्नमा उहाँले तेहरानको सैद्धान्तिक नीति छिमेकीहरूसँग सुमधुर सम्बन्ध कायम राख्नु भएको उल्लेख गर्नुभयो । उहाँले अमेरिकाविरुद्ध इरानका कारबाहीहरू कुनैपनि हालतमा क्षेत्रीय राष्ट्रहरूप्रतिको शत्रुताको संकेत नभएको प्रष्ट पार्नुभयो ।

बाघेईले इरानमाथि अन्यायपूर्ण र बिना कुनै कारण आक्रमण गरिएको बताउँदै आवश्यक कदम नचालेमा युद्धको ज्वाला जताततै फैलिने चेतावनी दिनुभयो । गत शनिवार बिहान तेहरान र अन्य इरानी शहरहरूमा अमेरिका र इजरायलले गरेको संयुक्त हवाई आक्रमणमा सर्वोच्च नेता अली खामेनी, उहाँका परिवारका केही सदस्य, वरिष्ठ सैन्य कमाण्डरहरू र सर्वसाधारणको मृत्यु भएको थियो । यसको प्रतिक्रिया स्वरूप इरानले इजरायल र मध्यपूर्वमा रहेका अमेरिकी सैन्य अड्डाहरूलाई लक्षित गरी विभिन्न चरणमा मिसाइल र ड्रोन आक्रमणहरू गरेको थियो ।