विदेशी मुद्रा सञ्चिति नाघ्यो ३३ खर्ब, २१ महिनाको आयात धान्ने

काठमाडौँ। मुलुकको ढुकुटीमा विदेशी मुद्रा सञ्चिति ३३ खर्ब नाघेको छ।

नेपाल राष्ट्र बैंकले आज सार्वजनिक गरेको चालु आर्थिक वर्षको सात महिना (साउनदेखि माघसम्म) को वित्तीय विवरण अनुसार विदेशी मुद्रा सञ्चििति ३३ खर्ब २ अर्ब रुपैयाँ बराबर पुगेको हो ।

असार मसान्तसम्म २६ खर्ब ७७ अर्ब रुपैयाँ थियो। यो हिसाबले सञ्चिति २३.३ प्रतिशतले देखिएको हो।

कुल विदेशी विनिमय सञ्चितिमध्ये नेपाल राष्ट्र बैंकमा २९ खर्ब २६ अर्ब ९९ करोड छ। बैंक तथा वित्तीय संस्था (राष्ट्र बैंकबाहेक) सँग ३ खर्ब ७५ अर्ब ६७ करोड रुपैयाँ बराबर छ।

मुद्रा सञ्चितिमा भारतीय मुद्राको अंश २१.५ प्रतिशत रहेको राष्ट्र बैंकले जनाएको छ। बैंकिङ क्षेत्रसँग रहेको विदेशी विनिमयको यो सञ्चितिले २१.३ महिनाको वस्तु आयात र १८ महिनाको वस्तु तथा सेवा आयात धान्न पर्याप्त हुने बताइन्छ।