आयल निगम भन्छ- ग्यास आयात भइरहेको छ, उपभोक्ताले बढी भण्डारण नगरे सात दिनमै सहज हुन्छ

काठमाडौं। नेपाल आयल निगमले उपभोक्ताले घरमा अनावश्यक भण्डारण गरेकै कारण बजारमा एलपी ग्यास अभाव देखिएको जनाएको छ। त्यसरी भण्डारण नगरे एक हप्ताभित्रै सहज हुने निगमको दाबी छ।

शुक्रबार पत्रकार सम्मलेन गर्दै निगमले मासिक खपत अनुसार नियमित ग्यास आयत भइरहेको जनाएको छ। निगमका प्रवक्ता मनोज ठाकुरले भन्नुभयो, `यहाँ मासिक खपत ४५ देखि ४६ हजार मेट्रिक टन हो। त्यो अनुसार हरेक महिना पाएकै छौँ। फागुनको २६ गतेसम्म पनि साढे ४५ हजार मेट्रिक टन ग्यास हामीकोमा आएको छ।’

ठाकुरले फागुनमा करिब ४९ हजार मेट्रिन टन ग्यास आयत भएको जानकारी दिनुभयो। ‘हालसम्म पनि ग्यास सहजै रुपमा आयत भइरहेको छ । तर उपभोक्ताले अनावश्यक भण्डारण गरे’, उहाँले भन्नुभयो, ‘त्यसरी थुपारेन भने एक हप्तामा ग्यास पाउने सहज वातावरण मिल्छ। आवश्यक नभई खरिद नगर्न हामी आग्रह गर्दछौँ।’

घरमा अनावश्यक ग्यास भण्डार गर्दा जोखिम निम्तिने पनि उनले बताउनुभयो। ‘विभिन्न हल्लाले पहिला एक वटा ग्यासले एक महिना पुग्ने ठाउँमा उपभोक्ताले धेरै भण्डारण गरेका छन्। यो काम भनेकाे जोखिम नित्याउनु पनि हो। त्यसैले त्यसरी घरघरमा स्टक नगर्नुस्’,’ उहाँले आग्रह गर्नुभयो।

नेपाल आयाल निगमले ग्यास अभाव हुन नदिनका लागि आजदेखि आधा सिलिण्डर बाँड्न थालेको छ। यसअघि १४.२ केजीको सिलिण्डर बिक्री हुँदै आएको थियो।निगमका अनुसार हाल देशभर करिब एक करोड ५० लाख ग्यास सिलिण्डर छन्।

निगमका कार्यकारी निर्देशक चण्डिकाप्रसाद भट्टले बजारमा अहिले आपूर्तिमा कुनै समस्या नभए पनि उपभोक्ताले अनावश्यक स्टक गर्दा अभाव देखिएकाले यो पनि नहोस् भनेर आधा सिलिण्डर दिने व्यवस्था गरेको जानकारी दिनुभयो।

यतिखेर खाना पकाउने एलपी ग्यासको सहज आपूर्ति नहुँदा सर्वसाधारणले फेरि सास्ती भोग्नुपरेको छ। ग्यास डिपो र उद्योगहरू बाहिर आधा सिलिण्डर ग्यास पाउनका लागि उपभोक्ता बिहानैदेखि लाइनमा बस्न बाध्य छन्। ग्यास उद्योग (डिपो) बाहिर सडकको किनारमा खाली सिलिण्डरको लामो लाइन देख्न सकिन्छ।

विशेषगरी ‘नेपाल ग्यास’का राता सिलिण्डर सडकपेटीमा लाम लगाइएका छन्। लाइनमा बालबालिका र युवादेखि वृद्धसम्म देखिन्छन्। पालो कुरेर घण्टौँ उभिनुपर्दा उपभोक्ताको अनुहारमा थकान र निराशा प्रष्टै देखिन्छ