काठमाडौं। इंग्लिस प्रिमियर लिगमा म्यानचेस्टर युनाइटेडले हार्दा म्यानचेस्टर सिटीले जित निकालेको छ। गए रातिको खेलमा म्यानचेस्टर युनाइटेड ब्राइटनसँग पराजित भएको छ। यता सिटी भने इप्सविच टाउनसँग सानदार जित निकाल्न पुगेको हो। युनाइटेड ब्राइटनसँग घरमै ३-१ गोलले पराजित भएको हो।
वर्ल्ड ट्राफोर्डमा खेलको पाँचौं मिनेटमै यान्कुबा मिन्तेहले युनाइटेडविरूद्ध गोल गरे। २३ मिनेटमा पेनाल्टीमार्फत ब्रूनो फर्नान्डिजले बराबरी गोल फर्काएका थिए। ६० मिनेटमा काउरू मिटोमाले गोल गरी ब्राइटनलाई अग्रता दिलाएका थिए। ७६ मिनेटमा पुनः ब्राइटनकै जर्जिनिओ रूटरले गरेको गोल निर्णायक बनेपछि युनाइटेड घरमै स्तब्ध भएको हो।
जितसँगै ब्राइटन ३४ अंक बनाएर तालिकाको नवौं स्थानमा उक्लिएको छ। म्यानचेस्टर युनाइटेड २६ अंकका साथ १३ औं स्थानमा छ। यता सिटीले इप्सविचलाई ६-० गोलले पराजित गरेको हो।
इप्सविचविरूद्धको जितमा फोडेनले दुई गोल गरे। २७ मिनेटमा उनले पहिलो गोल गर्दै टिमलाई अग्रता दिलाएका थिए। ३० मिनेटमा कोभ्यासिकले अग्रता दोब्बर पारे। ४२ मिनेटमै फोडेनले व्यक्तिगत दोस्रो गोल गरे। दोस्रो हाफको ४९ मिनेटमा जेरेमी डोकुले गोल गरे। ५७ मिनेटमा एर्लिङ हालान्ड र ६९ मिनेटमा जेम्स मिकाटीले गोल गरेपछि सिटीले सानदार जित हासिल गरेको हो।
जितसँगै ३८ अंक बनाएर सिटी अंक तालिकाको चौथो स्थानमा उक्लिएको छ। इप्सविच टाउन १८ औं स्थानमा छ।
