अनुसन्धान बढाउन सात वर्षअघि बलात्कृत भएकी युवतीको घरमा पुग्यो प्रहरी टोली

काठमाडौं । सौन्दर्य प्रतियोगिताका आयोजकद्वारा सात वर्षअघि नशालु पदार्थ खुवाएर बलात्कृत भएको भनि सार्वजनिक भएकी युवतीसम्म प्रहरी पुगेको छ ।

हदम्यादका कारण पीडकमाथि कारबाही नहुने भन्ने सुनेपछि विक्षिप्त भएको घटनाको अनुसन्धान सूक्ष्म तरिकाले बढाउन प्रहरीले परिवारसँग सम्पर्क बनाइसकेको जनाएको छ ।

हदम्यादका कारण पीडकमाथि कारबाही नहुने भन्ने सुनेपछि विक्षिप्त अवस्थामा अर्को भिडियो सार्वजनिक भएपछि नेपाल प्रहरीका प्रवक्ता विष्णुकुमार केसीको टोलीसहित उनको घरसम्म पुगेको हो ।

प्रहरीले युवतीको परिवारसँग सम्पर्कमा रहेको खुलाए । अभिभावकसँग वृस्तृत बुझेर आवश्यक कदम चाल्ने उनको भनाई छ ।

युवतीलाई काउन्सिलिङको जरुरी रहेको भन्दै प्रहरीले कदम बढाइसकेको छ । घटनासँग जोडिएकाहरुबारे समेत निगरानी बढाइएको र कुनैपनि बेला अनुसन्धानको दायरामा ल्याउने तयारी भएको प्रहरी स्रोतको भनाई छ ।

सुन्दरी प्रतियोगिताका आयोजकले १६ वर्षमै बलात्कार गरेको भन्दै युवतीले सामाजिक सञ्जालमार्फत् खुलासा गरेकी छिन् । उनले आफूमाथि यौन दुव्र्यवहार गर्ने व्यक्तिको नाम नलिएपनि ती कन्सल्ट्यान्सीका सञ्चालक रहेको बताएकी छिन् ।

युवतीले ८ वर्ष अघिको घटनामा एकजना फोटोग्राफरको पनि नाम जोडेकी छिन् । ती फोटोग्राफरले आफ्नो पेशा नै फोटो खिच्ने रहेको र घटनामा कुनै संलग्नता नरहेको बताएका छन् । उनले भविष्यमा युवतीले बढाउने कानूनी प्रक्रियामा आफ्नो साथ हुने समेत बताए ।

युवतीले पूर्व मिस नेपाल माल्भिका सुब्बाले पनि कठिन घडीमा साथ नदिएको खुलाएकी छिन् । सुब्बाले पनि यसप्रति माफी मागेकी छिन् ।

जबरजस्ती करणी सम्बन्धी कसुरमा एक वर्षभित्र उजुरी दिइसक्नुपर्ने हदम्याद छ । जस कारण उनले न्याय नपाउने अवस्था भएको भन्दै आलोचना भइरहेको छ । उनको पक्षमा युवाले शुक्रवार प्रधानमन्त्रीको सरकारी निवास बालुवाटारमा पनि धर्ना दिएका छन् । उनीहरूले बलात्कारको कसुरमा राखिएको हदम्याद हटाउन माग गरेका छन् ।

यसविषयमा आज संसद्मा समेत प्रवेश पाएको थियो । यौन दुव्र्यवहारको घटना खुलेपछि सभामुख अग्निप्रसाद सापकोटाले पनि सरकारलाई यसबारे अनुसन्धान बढाएर दोषीमाथि कारबाही गर्न रुलिङ गरेका छन् । यो घटना अहिले देशव्यापी बहसको विषय बनेको छ ।