काठमाडौं । प्रतिनिधिसभाको शिक्षा तथा स्वास्थ्य समितिमा योगमाया आयुर्वेद विश्वविद्यालय विधेयक, २०७६ माथिको दफाबार छलफल भएको छ ।
आयुर्वेद शिक्षालाई राष्ट्रिय पहिचान र आवश्यकताअनुरुप विकास गरी आयुर्वेद शिक्षासम्बन्धी शिक्षालाई व्यवस्थित गर्न तत्कालीन सरकारका तर्फबाट शिक्षा, विज्ञान तथा प्रविधिमन्त्री गिरिराजमणि पोखरेलले सो विधेयक सदनमा पेश गरेका थिए ।
समितिको आजको बसेको बैठकमा सो विश्वविद्यालयको प्रकृति, संगठनात्मक संरचना, लगानी, अध्ययन अनुसन्धानका क्षेत्रलगायतका विषयमा सांसदहरुले धारणा राखे ।
बैठकमा शिक्षा विज्ञान तथा प्रविधिमन्त्री देवेन्द्र पौडेलले विधेयक अहिलेको आवश्यकता भएकाले संसद्को चालु अधिवेशनबाट पारित गर्नुपर्ने विचार व्यक्त गरे ।
पूर्वशिक्षामन्त्री एवं नेकपा (माओवादी केन्द्र)का पोखरेल, नेकपा (एमाले)का योगेश भट्टराई, सरिता न्यौपाने, नेपाली कांग्रेसका मीनबहादुर विश्वकर्मा, नेपाल मजदुर किसान पार्टीका प्रेम सुवाललगायतले छलफलमा भाग लिएका थिए ।
समितिका सभापति जयपुरी घर्तीले विधेयकलाई संशोधनसहित अर्को बैठकले पारित गर्ने जानकारी दिएकी थिइन् ।
