एन्फा महिला लिग : बागमतीको पोष्टमा एपीएफको आधा दर्जन गोल

काठमाडौं। एन्फा महिला लिगअन्तर्गत अन्तिम चरणमा विभागीय टोली एपीएफ फुटबल क्लबले बागमती युवा क्लवविरुद्ध सहज जित हासिल गरेको छ।

सातदोबाटोस्थित एन्फा कम्प्लेक्समा बुधवार भएको खेलमा एपीएफले बागमतीलाई ६-० ले हरायो। एपीएफको जितमा सरु लिम्बु र रश्मिकुमारी घिसिंङले समान २ र प्रीति राईले १ गोल गरिन् । बागमतीले २ आत्मघाती गोल गर्यो।

४२औं मिनेटमा रश्मिको गोलबाट एपीएफले अग्रता लियो। पहिलो हाफको इन्ज्युरी समयमा रश्मिले गोल गरिन्। ५४औं मिनेटमा बागमतीकी सेमी हाङमा लिम्बुको आत्मघाती गोल गर्दा एपीएफको‌ अग्रता ३-० भयो।

५५ औं मिनेटमा सुरुले र ८७औं मिनेटमा प्रीतिले गोल गरिन्। इन्ज्युरी समयमा सरुले व्यक्तिगत दोस्रो गोल गरेपछि एपीएफले लगातार पाँचौं जित निकाल्यो।शीर्ष स्थानको एपीएफको ५ खेलमा १५ अंक छ। शीर्ष स्थानमा रहेको छ। पाँचौं खेलमा चौथो हार बेहोरेको बागमतीको ३ अंक छ।