काठमाडौँ। नेकपा एमालेमा दुई पटक प्रमुख कार्यकारी भूमिका निर्वाह गरेका माधव नेपालले अब त्यही पार्टीमा प्रवेशमा रोक लगाइएको छ।
उनी हाल नेकपा एकीकृत समाजवादीका अध्यक्ष छन्। तर, यदि चाहेर पनि उनी एमालेमा प्रवेश नपाउने भएका छन्। एमालेका महासचिव शंकर पोखरेलले आज एक सार्वजनिक कार्यक्रममा नेपालबाहेकलाई मात्र एमाले स्वागत गर्न तयार रहेको बताएका छन्।
प्रेस चौतारी नेपालबाट विभाजन भएर बनेको प्रेस संगठनका अध्यक्ष विश्वमणि सुवेदी सहितका पत्रकारलाई शुक्रबार प्रेस चौतारी नेपालमा भित्र्याउँदै पोखरेलले माधव नेपालले एमाले फुटाएर ठूलो गल्ती गरेको भन्दै उनका लागि एमालेको ढोका खुला नभएको बताए ।
नेपालले एमालेबाट अलगिएर जीवनको सबैभन्दा ठुलो भुल गरेको समेत उनले बताए । नेतृत्वले जनताको भावनालाई बुझ्न नसक्दा बेला बखतमा दुर्घटना हुने गरेको उनको भनाइ छ । त्यही दुर्घटनामा माधव नेपाल पनि परेको पोखरेलले स्पष्ट पारे ।
एमालेभित्र लामो जीवन बिताएका र योगदान गरेका नेता कार्यकर्ताले आफ्नो भविष्य सुरक्षित गर्ने हो भने समाजवादीमा अलमलिन नहुने उनले बताए । त्यस्तै उनले सरकारले दल विभाजनको अध्यादेश ल्याउला र आफ्नो पार्टी सकिएला भन्ने चिन्ता नेपाललाई भएको बताए। महासचिव पोखरेलले देशका पक्षमा उभिएको कारण केपी ओली माथि आक्रमण भएको र ओलीमाथिको आक्रमण मुलुकमाथिको आक्रमण भएको तर्क समेत गरे।
