काठमाडौँ। राष्ट्रिय प्रजातन्त्र पार्टी (राप्रपा) को भ्रातृ संगठन राष्ट्रिय प्रजातान्त्रिक युवा संगठनको महाधिवेशन चैतमा हुने भएको छ। संगठनको आज काठमाडौंमा बसेको पदाधिकारीको वैठकले आउदो चैत १६ देखि १८ गतेसम्म काठमाडौंमा महाधिवेशन सम्पन्न गर्ने निर्णय गरेको संगठनका सदस्य सचिव निराजन बमले जानकारी गराएका छन्।
राप्रपाको हालै सम्पन्न केन्द्रीय कार्यसमितिको बैठकले महाधिवेशन गर्न बाँकी रहेका भ्रातृ संगठनहरूको महाधिवेशन चैत मसान्तसम्म सक्न निर्देशन दिएको थियो।
‘पार्टीको निर्णय अनुसार सबै भातृ संगठनहरू महाधिवेशनको आन्तरिक तयारीमा जुटिरहेको र हामीले पनि युवा संगठनको महाधिवेशन समयमा सम्पन्न गर्न आज निर्णय गरेका छौं,’ सदस्य सचिव बमले बताएका छन्।
अध्यक्ष राजेन्द्र लिङ्देनले महाधिवेशन गर्न बाँकी रहेका भातृ संगठनको महाधिवेशन समयमै सम्पन्न गर्न निर्देशन दिँदै आएका छन्। राष्ट्रिय प्रजातान्त्रिक युवा संगठनको विधानले निर्दिष्ट गरेको प्रावधानअनुसार महाधिवेशन गर्न हरेक हिसाबले तयारी भएको संगठनका सदस्य सचिव निराजन बमको भनाइ छ।
अहिलेसम्म ४० जिल्लाको अधिवेशन सम्पन्न भइसकेको, केही जिल्लामा अधिवेशनको मिति टुंगो लागिसकेको र बाँकी जिल्लाका अधिवेशन फागुनको तेस्रो सातासम्म सकिने र चैत पहिलो साताभित्र महाधिवेशन प्रतिनिधिहरुको नामावली समेत जिल्लाबाट पठाउन पत्राचार गर्ने निर्णय गरिएको छ।
