शिक्षक आन्दोलनको समय फेरियो

काठमाडौं। काठमाडौं केन्द्रित शैक्षिक आन्दोलनको समय हेरफेर भएको छ। नेपाल शिक्षक महासंघका अध्यक्ष लक्ष्मीकिशोर सुवेदीले बुधबारबाट बिहान ११ बजेदेखि दिउँसो २ बजेसम्म आन्दोलन हुने जानकारी दिए।

यसअगाडि शिक्षकहरूले बिहान ९ बजेदेखि नै आन्दोलन गर्ने गरेका थिए। शिक्षा ऐन लगायत विभिन्न माग राख्दै सामुदायिक विद्यालयका शिक्षकहरू आन्दोलनमा रहेका छन्। शिक्षक महासंघको नेतृत्वमा सुरु गरिएको सो आन्दोलनले अहिले सम्म हिंसात्मक रुप भने लिएको छैन।

शिक्षकहरू अहिले माइतीघर मण्डलदेखि नयाँबानेश्वरसम्मै सडक भरी छरिएर गीत गाउँदै, नाच्दै सरकारसँग आफ्ना माग सम्बोधन गर्न अनुरोध गरिरहेका छन्।