रास्वपाले रुपन्देही–३ मा उम्मेदवार छनोट विधि आइतबार टुङ्गो लगाउने

काठमाडौं। राष्ट्रिय स्वतन्त्र पार्टी (रास्वपा) ले रुपन्देही–३ मा आगामी कात्तिक १७ गते हुने उपनिर्वाचनमा उम्मेदवार छनोट विधि आगामी बैठकले टुङ्ग्याउने निर्णय गरेको छ ।

बिहीबार पार्टी कार्यालय वनस्थलीमा बसेको सचिवालय बैठकले योग्य उम्मेदवार छनोट गर्ने प्रस्ताव पेस भएको हो । सोही विधिमार्फत आइतबारको बैठकले उम्मेदवार छनोट विधि टुङ्ग्याउने निर्णय भएको महामन्त्री कवीन्द्र बुर्लाकोटीले जानकारी दिए ।

‘योग्य उम्मेदवार छनोट गर्ने प्रस्ताव विधि प्रस्तावित भयो । त्यस विधिमाथि आगामी बैठकले टुङ्गो लगाउने निर्णय भयो । केही उम्मेदवारहरूको प्रस्ताव आएका छन् । केही आउन बाँकी छन् ।

तथापि पार्टीले योग्य उम्मेदवार छनोट विधि बनाउने सोही विधिमार्फत योग्य उम्मेदवार छनोट गर्ने निर्णय गरेको छ’, रातोपाटीसँग उनले भने । उम्मेदवारको विषयमा सागर ढकाल, कुलमान घिसिङ लगायत कुनै व्यक्ति छनोट हुन सक्ने भए पनि व्यक्तिको बारेमा प्रवेशै नगरेको बुर्लाकोटीले दाबी गरे ।

‘व्यक्तिमा प्रवेश गरिएन । तर योग्य उम्मेदवार छनोट गर्न विधि नै बनाएर जाने भन्ने छ । छनोटका लागि छुट्दै नछुट्ने प्राइमरी इलेक्सन हो । स्थानीय सदस्यहरूको पनि भूमिका रहने गरी उम्मेदवार छनोट विधि प्रस्ताव भएको छ । त्यसको आउने आइतबार बैठक बसेर टुङ्गो लाग्छ’, उनले भने ।