कृष्ण सिटौलाले भने : संवैधानिक परिषद्‍मा सर्वसम्मति नजुटेमा बहुमतले निर्णय गर्ने व्यवस्था राख्नुपर्छ

काठमाडौँ। नेपाली कांग्रेसका नेता कृष्णप्रसाद सिटौलाले संवैधानिक परिषद्‍मा बहुमतले निर्णय गर्न सक्ने व्यवस्था राख्नुपर्ने बताएका छन्।

आइतबार केही पत्रकारहरुसँग कुराकानी गर्दै उनले निर्णयको सहजताका लागि त्यस्तो व्यवस्था राख्नुपर्ने तर्क गरेका हुन्।

राष्ट्रपति रामचन्द्र पौडेलले भने बहुमतले निर्णय गर्न सक्नेगरि संसद्बाट पारित भएर गएको संवैधानिक परिषद्सम्बन्धी विधेयक फिर्ता गरिदिएका छन्।

‘मलाई लागेको के हो भने संवैधानिक परिषद्ले पहिलो चरणमा सर्वसम्मतीले निर्णय गर्नुपर्छ। त्यसबेला बहाल रहेका सबै सदस्यहरू उपस्थित भएनन् भने सबै उपस्थित हुनुपर्छ र सर्वसम्मत निर्णय लिनुपर्छ भन्ने पहिलो हो,’ सिटौलाले भने, ‘विधेयकको मनसाय त्यही मैले बुझेको हो।’

उनले थपे, ‘दोस्रो सर्वसम्मत हुन सकेन र सबै सदस्य उपस्थित हुन सकेनन् भने के गर्ने भन्ने छ। दोस्रो पटक बैठक बोलाउँदा बहुमत उपस्थित भए भने बहुमतले निर्णय गर्नुपर्छ भन्ने हो।’