इजाजत पूरा नगरी सञ्चालित कन्सल्टेन्सीमाथि कारबाही, यी हुन् कारबाहीमा परेका कन्सल्टेन्सी

काठमाडौं । वाणिज्य, आपूर्ति तथा उपभोक्ता संरक्षण विभागले ९ एजुकेसन कन्सल्टेन्सीलाई इजाजत नलिई सञ्चालन गरेको पाइएपछि ६ लाख २ हजार रुपैयाँ जरिबाना तिराएको छ।
कारबाही गरिएका कन्सल्टेन्सीहरूलाई उपभोक्ता संरक्षण ऐन २०७५ को दफा ३८ (ट) बमोजिम जरिबाना गरिएको विभागका वरिष्ठ अनुगमन निरीक्षक अमित झाले बताए।
विभागले ८ वटा कन्सल्टेन्सीलाई ३ दिनभित्र कागजातसहित विभागमा उपस्थित हुन निर्देशन दिएको छ र ७० प्रतिशत कन्सल्टेन्सीहरू अवैध सञ्चालनमा रहेको पाइएको छ।

विभागले काठमाडौं महानगरपालिका-२८ मा रहेको रिड एजुकेसन हब प्रालि, परसुट अब्रोड स्टडिज, इनोभा एजुकेसन कन्सल्टेन्सी र भक्तपुर नगरपालिका–४ को स्योउराई इन्टरनेसनल एजुकेसन प्रालिलाई समान १-१ लाख रुपैयाँ जरिबाना तिराएको जानकारी दिएको छ ।

यस्तै काठमाडौं महानगरपालिका-२८ मा रहेको प्यासन फाउन्डेसन प्रालि र काइट इन्टरनेसनल प्रालिलाई समान ५१-५१ हजार रुपैयाँ जरिबाना तिराएको छ भने भक्तपुर नगरपालिका-३ को आशीर्वाद ल्यांग्वेज प्रालि र काठमाडौं महानगरपालिका-१६ मा रहेको छाङमी एजुकेसन प्रालिलाई समान ५०-५० हजार रुपैयाँ जरिबाना तिराएको छ ।

j