क्षतविक्षत बनेको एमाले मुख्यालय लयमा फर्काउने प्रयास

काठमाडौं। जेनजी आन्दोलनका नाममा गरिएको विध्वंसात्मक प्रदर्शनका कारण क्षतविक्षत भएका भवनहरू पुनर्निमान गर्न थालिएको छ।

गत भदौ २४ मा देशभर संरचनामाथि आगलागी र तोडफोड गरेका भवनलाई पुरानै लयमा फर्क्याउने प्रयत्न गरिएको छ। जेनजीको आन्दोलनमा क्षतविक्षत भएका संरचनामध्ये एक हो, च्यासलस्थित एमाले मुख्यालय। विभिन्न समूहमा आएका युवाले च्यासललाई चारैतिरबाट तोडफोड गरेका थिए। भग्नावशेष जस्तो बनेको संरचनालाई लयमा फर्काउन एमालेका युवा नेताहरू कस्सिएका छन्।

आन्दाेलनकारीले एमाले कार्यालयको भित्ता र पर्खालमा अध्यक्ष केपी शर्मा ओलीविरुद्ध गाली गर्दै लेखेका अश्लील शब्दहरू पनि आज हटाइएको छ । नेताहरू रोशन बस्नेत र प्रकाश गौतमले ती सबै शब्दहरू मेटाउनुभएको छ।

आजै एमालेको पार्टी कार्यालयमा झण्डा राखिएको छ । महासचिव शङ्कर पोखरेल र उपमहासचिव प्रदीप ज्ञवालीलगायतका नेता कार्यकर्ताहरू सोमबार च्यासलस्थित कार्यालय पुग्नुभएको थियो।

२४ भदौमा आन्दाेलनरत पक्षबाट जलाइएको कार्यालयमा पुगेका नेता कार्यकर्ताहरूले पार्टीको झण्डाले जलेको भवनको एक छेउ ओताएका छन् । महासचिव पोखरेलले सरकारी संयन्त्रसँग समन्वय गरेर सार्वजनिक संरचनाको निर्माणका लागि योगदान गर्न पनि पार्टी पङ्क्तिलाई निर्देशन दिनुभयो।

उनले महासचिव पोखरेलले असोज ३ गते खरानीको थुप्रोबाट नै संविधान दिवस मनाउन पनि सबैलाई निर्देशन दिनुभयो।