भोजपुरमा रेविजविरुद्ध खोप अभियान सञ्चालन

भोजपुर। जिल्लामा रेविज रोग नियन्त्रण र रोकथामका लागि खोप अभियान सुरु गरिएको छ। प्राणघातक रेविज रोग निन्यन्त्रणका उद्देश्यले साप्ताहिक खोप अभियान सञ्चालन गरिएको हो।

भेटेरेनरी अस्पताल तथा सेवा विज्ञ केन्द्र भोजपुरका प्रमुख पुष्पराज दाहालका अनुसार गाउँघरमा रहेका कुकुर र बिरालोलाई निःशुल्क खोप लगाउने काम भइरहेको छ।
“रेविज रोग नियन्त्रणका लागि निःशुल्क खोप अभियान सञ्चालन गरिरहेका छौँ,” दाहालले भन्नुभयो, “यो अभियानमार्फत घरपालुवा सम्पूर्ण कुकुर, बिरालोलाई खोप लगाइन्छ।”

असोज ६ गतेदेखि सुरु भएको अभियान आगामी १२ गतेसम्म सञ्चालन हुनेछ। अहिले दैनिक १५ देखि २० वटा कुकुर तथा बिरालोलाई खोप लगाउन स्थानीयले ल्याउने गरेका छन्।
कार्यालयका अनुसार रेविज रोग उन्मूलनका लागि वर्षेनी खोप अभियान सञ्चालन हुँदै आएको छ।