बागलुङमा १५ हजार हेक्टर जमिन बाँझो

बागलुङ। बागलुङका ग्रामीण क्षेत्रहरू बसाइँसराइ र युवा पलायनका कारण सुनसान बन्दै गएका छन्। यसले धान, गहुँ, मकै फल्ने खेतीयोग्य जमिन बाँझो हुने क्रम बढाएको छ। कतै सिउँडी पलाएका छन्, कतै बनमाराले ढाकिएका छन् भने घर पनि रुग्ण अवस्थामा छन्।

काठेखोला गाउँपालिका, जैमिनी र गलकोट नगरपालिकामा बसाइँसराइले सहरतर्फ युवा शक्ति झरेको छ। बागलुङमा कुल एक लाख ७८ हजार ४०६ हेक्टर जमिनमध्ये ४६ हजार १४८ हेक्टर मात्र खेतीयोग्य रहेको छ। तर अहिले ३० हजार ५०३ हेक्टरमा मात्रै खेती भइरहेको कृषि ज्ञान केन्द्रका सूचना अधिकारी सन्तोष अधिकारीले जानकारी दिनुभयो।

अधिकारिक तथ्याङ्क अनुसार कूल खेतीयोग्य जमिनको १७ प्रतिशतमा मात्रै खेती भइरहेको छ। हाल १५ हजार ६४५ हेक्टर जमिन बाँझो छ। आगामी वर्ष यो संख्या अझ बढ्न सक्ने अनुमान गरिएको छ।

जैमिनी–४ की देवी शर्माले ८० प्रतिशत बारी झाडीमा परिणत भएको बताइन्। काठेखोला–८ का मेघराज कँडेलले पनि गाउँको आधाभन्दा बढी खेतीयोग्य जमिन बाँझो बनेको बताए।