स्वच्छ राजनीतिक प्रतिस्पर्धामार्फत निकास खोज्न आयोगको आग्रह

काठमाडौं। राष्ट्रिय मानवअधिकार आयोगले राजनीतिक दल र समूहलाई जनमतमा आधारित स्वच्छ राजनीतिक प्रतिस्पर्धा मार्फत राजनीतिक निकास खोज्न आग्रह गरेको छ। आयोगले नागरिक समाज, सञ्चारकर्मी र मानवअधिकारकर्मीलाई पनि सो कार्यमा सहयोग गर्न अनुरोध गरेको छ।

आयोगका प्रवक्ता डा टीकाराम पोखरेलले जारी प्रेस विज्ञप्तिमा भनेका छन्, “आगामी प्रदर्शनहरू मर्यादित र संयमित राख्न, अरुप्रति लक्षित घृणायुक्त अभिव्यक्ति बन्द गर्न, सामाजिक सद्भाव कायम राख्न र स्वच्छ राजनीतिक प्रतिस्पर्धामार्फत राजनीतिक निकासको प्रक्रियामा सहभागी हुन राजनीतिक दल र समूहलाई आयोग आग्रह गर्दछ।”

विज्ञप्तिमा आयोगले थप उल्लेख गरेको छ कि हिंसात्मक गतिविधि, नकारात्मक टीकाटिप्पणी र घृणायुक्त अभिव्यक्तिले सामाजिक सद्भाव खल्बलिने र राजनीतिक वातावरण धुमिल हुने भएकाले शान्ति सुरक्षा र विधिको शासनमाथि प्रतिकूल असर पर्न सक्नेछ।

आयोगले सार्वजनिक तथा व्यक्तिगत सम्पत्तिको संरक्षण, विधिको शासन कायम राख्ने र सामाजिक सद्भाव सुनिश्चित गर्दै राजनीतिक सङ्क्रमणकालीन अवस्थालाई जनमतमा आधारित स्वच्छ प्रतिस्पर्धामार्फत निकास दिनु राज्यको दायित्व भएको र त्यस प्रक्रियामा सहभागी हुनु आम नागरिकको कर्तव्य भएको पनि स्पष्ट पारेको छ।