रास्वपा र विवेकशील साझा पार्टीबीच एकता, यस्तो छ सहमति

काठमाडौं। राष्ट्रिय स्वतन्त्र पार्टी (रास्वपा) र विवेकशील साझा पार्टीबीच एकीकरण भएको छ। दुई पार्टीबीच आइतबार राष्ट्रिय सभागृहमा आयोजित कार्यक्रमबीच पाँच बुँदे सहमति पत्रमा हस्ताक्षर  गरी एकीकरण गरिएको हो।

सहमति पत्रमा रास्वपाको तर्फबाट कार्यवाहक सभापति डोलप्रसाद अर्याल र उपसभापति स्वर्णिम वाग्ले, भने विवेकशील साझाबाट अध्यक्ष समीक्षा बास्कोटा र उपाध्यक्ष प्रकाशचन्द्र परियारले हस्ताक्षर गरेका छन्। कार्यक्रम राष्ट्रिय सभा गृहमा आयोजित गरिएको थियो।

हस्ताक्षर पत्रमा मुख्य रूपमा निम्न बुँदाहरू समेटिएका छन्:

राजनीतिक सिद्धान्त र योगदानको मान्यता: रास्वपाको राजनीतिक सिद्धान्त र नेतृत्व निःशर्त स्वीकार गर्दै वैकल्पिक राजनीतिको प्रवर्द्धनमा स्व. उज्वल थापा र ‘विवेकशील अभियान’को योगदानलाई दस्तावेजीकरण गरी मान्यता दिने।

एकीकरणको नेतृत्व संरचना: रास्वपाको राष्ट्रिय महाधिवेशनसम्मको लागि बनाइएको ‘संघीय नेतृत्व मञ्च’मा विवेकशील साझाबाट आउने नेताहरूलाई आपसी समझदारीमा मनोनयन गर्ने। मञ्च सदस्यको वरीयता केन्द्रीय समितिको सदस्य सरह रहने।

समायोजन र जिम्मेवारी: विवेकशील साझाका सदस्य र सल्लाहकारलाई केन्द्रीय, प्रादेशिक र स्थानीय तहगत संरचनामा योग्यता, समावेशिताको सिद्धान्त र सार्वजनिक छविलाई आधार मान्दै जिम्मेवारी तोक्ने।

दलको नाम, झण्डा र चिन्ह: एकीकरण पश्चात् दलको नाम ‘राष्ट्रिय स्वतन्त्र पार्टी’, झण्डामा निलो पृष्ठभूमिमा सेतो रङको गोलाकार मध्यभागमा निलो रङको घण्टीको आकृति, र दलको चिन्ह ‘घण्टी’ रहने।

कानूनी प्रक्रिया र सम्पत्ति व्यवस्थापन: निर्वाचन आयोग सम्बन्धी कानूनी प्रक्रिया पूरा गर्न आवश्यक दस्तावेज तयार गर्ने र दलका नाममा रहेका चल-अचल सम्पत्तिको व्यवस्थापन आपसी समझदारीमा शीघ्र सम्पन्न गर्ने।

यस एकताको माध्यमबाट दलले लोकतान्त्रिक सुशासन र समुन्नतिको मुद्धा अघि बढाउने र अन्य सुसंस्कृत एवं परिवर्तनकामी वैकल्पिक राजनीतिक शक्ति, समूह र व्यक्तिलाई आह्वान गर्ने सहमति पनि भएको छ।