आठ महिनाअघि पूर्वप्रहरी हबल्दारको हत्या आरोपित पक्राउ

लमजुङ । लमजुङमा आठ महिनाअघि पूर्वप्रहरी हबल्दार सीता धिताल कंडेलको हत्या गरेको आरोपमा एक ब्यक्ति पक्राउ परेका छन् । पक्राउ पर्नेमा चितवनको रत्ननगर नगरपालिका –७ का ४७ बर्षीय बुद्धिराम दराई रहेका छन् ।

बेसीशहर नगरपालिका –२ भकुण्डेस्थित अस्थायी प्रहरी बिटनजिकै घर हुनुभएकी ४७ बर्षीय सीता धिताल कडेँलको गत चैत ३१ गते शव फेला परेको थियो । गत चैत २६ गते कंडेलको घर आएका दराई राति सँगै सुतेर २७ गते विहान हत्या गरेर फरार भएको प्रहरी अनुसन्धानमा खुलेको छ ।

विहीबार रुपन्देहीको सिद्धार्थनगर नगरपालिका –१ बेलहियाबाट पक्राउ परेका दराईलाई शुक्रबार सार्वजनिक गर्दै लमजुङ प्रहरीले उनीहरुको सम्बन्ध पुरानो रहेको बताएको छ ।

दराई यसअघि कर्तब्य ज्यान मुद्दामा जन्मकैद फैसला भई कारागार बसेको देखिन्छ । २०६७ मङ्सिर १२ गतेको कर्तब्य ज्यान मुद्दामा गोरखा अदालतबाट २०६८ असार २० गते जन्मकैद फैसला भएको थियो । २०७१ चैत १३ गते सर्वोच्च अदालतबाट १२ वर्ष कैद फैसला भएपछि दराई कैद भुक्तान गरी २०७६ असोज ३ गते धादिङ कारागारबाट छुटेका थिए ।

दराई र कंडेलबिच चितवन कारागार हुँदा चिनजान भएको थियो । दराई कारागारबाट छुटेपछि उनीहरुको नियमित भेटघाट भइरहेको भेटिएको प्रहरीले जनाएको छ । उनीहरुबिच शारीरिक सम्बन्धको साथै आर्थिक लेनदेनसमेत भेटिएको प्रहरीले जनाएको छ ।

घटनाको मुख्य कारणबारे अनुसन्धान जारी रहेको प्रहरी नायव उपरीक्षक रेशम बोहोराले बताउनुभयो । बोहोराले भन्नुभयो, “अहिले नै यही कारणले हत्या भएको भन्ने खुलेको छैन्, प्रारम्भिक अनुसन्धानमा दुवै जनाबिच मनमुटाव भई झगडा हुँदा हत्या भएको देखिन्छ ।”