कमलरीको समस्या सम्बोधनका लागि प्रदेश सरकार गम्भीर : मुख्यमन्त्री शाह

कैलाली । सुदूरपश्चिम प्रदेशका मुख्यमन्त्री कमल बहादुर शाहले मुक्त कमलरीको समस्या सम्बोधनका लागि प्रदेश सरकार गम्भीर रहेको बताउनुभएको छ।

कैलालीको घोडाघोडी नगरपालिका–२, साँडेपानीमा मुक्त कमलरी विकास मञ्चको १५ औँ साधारण सभामा उहाँले मुक्त कमलरीहरुको परिचय पत्रदेखि उनीहरूको अधिकार सुनिश्चित गर्न प्रदेश सरकार गम्भीर रहेको बताउनुभएको हो।

‘ मुक्त कमलरीको तथ्याङ्क आवश्यक छ । अझै धेरै मुक्त कमलरीहरूले परिचयपत्र नपाएको, सरकारी तालिम तथा अवसरबाट वञ्चित रहेको गुनासो आइरहेको छ, ’ मुख्यमन्त्री शाहले भन्नुभयो,‘मुक्त कमलरी परिचयपत्र वितरण र तालिम कार्यक्रमलाई प्राथमिकताका साथ अघि बढाइने छ । ’

मुक्त कमलरीहरुको अधिकार सुनिश्चित गर्न आवश्यक रहेको भन्दै उहाँले कमलरीसम्बन्धी कार्यविधिमा समावेश हुन छुटेका पक्षहरू संशोधनमार्फत तुरुन्त समेटिने स्पष्ट पार्नुभएको छ।