काठमाडौं १ बाट पशुपति शमशेर नउठ्ने

काठमाडौं। राष्ट्रिय प्रजातन्त्र पार्टी (राप्रपा) का पूर्वअध्यक्ष पशुपति शम्शेर राणाले काठमाडौं क्षेत्र नम्बर १ मा आफू उम्मेदवार नहुने बताउनुभईको छ

आफू काठमाडौं क्षेत्र नम्बर १ मा राम्रोसँग परिचित पनि नरहेको उहाँको भनाइ छ।

फागुन २१ को प्रतिनिधि सभा निर्वाचनका लागि राप्रपाबाट काठमाडौं १ मा प्रत्यक्षतर्फ दुई वटा सूची सिफारिस भएको थियो।

एउटा सूची पूर्वअध्यक्ष पशुपति शम्शेर राणालाई पहिलो नम्बरमा राखेर सिफारिस छ भने अर्को सूची वरिष्ठ उपाध्यक्ष रवीन्द्र मिश्रलाई पहिलो नम्बरमा राखेर सिफारिस भएको छ। यसले पार्टीभित्र तरंग ल्याएको छ।

यसबीच वरिष्ठ उपाध्यक्ष मिश्रले पूर्वअध्यक्ष पशुपति शम्शेर राणालाई भेटेर यसबारे जिज्ञासा राख्नुभएको थियो र पशुपतिको भिडिओ क्लिप पनि सोमबार सामाजिक सञ्जाल एक्समा सार्वजनिक गर्नुभएको थियो।

जसमा पूर्वअध्यक्ष पशुपति शम्शेरले भन्नुभएको छ, `कस्तो कुरा गर्नुभएको, काठमाडौं क्षेत्र नम्बर १ मा म राम्रोसँग परिचित पनि छैन। हुन त काठमाडौं हरेक ठाउँ थाहा छ। जे भए पनि म त्यहाँ चाहिँ उम्मेदवार भएर उठ्ने मेरो कुनै नियत छैन।’

आफ्नो नाम काठमाडौं क्षेत्र नम्बर १ बाट सिफारिस भएको विषयमा आफूलाई जानकारी पनि नरहेको उहाँको भनाइ छ। सोही क्षेत्रबाट मिश्रले उठ्ने आकांक्षा राख्नुभएको छ।