राजनीतिक दलहरूसँगको छलफल सकारात्मक र फलदायी : मन्त्री सिन्हा

काठमाडाैं।  अन्तरिम सरकारका कानून, न्याय तथा संसदीय मामिलामन्त्री अनिलकुमार सिन्हाले राजनीतिक दलहरूसँगको छलफल सकारात्मक र फलदायी रहेको बताएका छन्। राष्ट्रिय प्रजातन्त्र पार्टी (राप्रपा)का नेताहरूसँगको भेटमा उनले यस्तो बताउनुभएको छ।

मन्त्री सिन्हाले आउने प्रतिनिधि सभा निर्वाचनलाई कसरी प्रभावकारी, धाँधलीरहित र स्वतन्त्र एवं सहज बनाउने भन्नेबारे छलफल भएको बताउनुभयो। उहाँले राप्रपाले निर्वाचन गराउनैपर्ने र त्यसका लागि आवश्यक सहयोग गर्न आफूहरू तयार रहेको प्रतिबद्धता जनाएको पनि बताउनुभयो।

‘आउने निर्वाचनलाई कसरी प्रभावकारी बनाउने, धाँधलीरहित, स्वतन्त्र र सहज रुपमा कसरी गर्न सकिन्छ भन्नेबारेमा छलफल भएको छ। चुनावी तयारी, समयबारे कुराकानी भएको छ। चुनाव हुन्छ भन्ने आश्वासन आएको छ। चुनावका लागि आवश्यक सहयोग गर्न तयार रहेको बताएकाे छ’, उहाँले भन्नुभयो,`अन्य सुधारका लागि सुझाव पनि दिँदै जाने कुराहरू भन्नुभएको छ। छलफल सकारात्मक र फलदायी रह्यो।’

सरकारद्वारा गठित राजनीतिक संवाद समितिको तर्फबाट कानूनमन्त्री सिन्हा, सञ्चारमन्त्री जगदीश खरेलसहित प्रधानमन्त्री सुशीला कार्कीका प्रमुख सल्लाहकार अजयभद्र खनाल निर्वाचनको वातावरण बनाइदिन आग्रह गर्दै राजनीतिक दलहरूको कार्यालयमा धाइरहनुभएको छ।