राप्रपासँग एकताअघि राप्रपा नेपालको समापन बैठक राख्दै कमल थापा

काठमाडौं। राष्ट्रिय प्रजातन्त्र पार्टी (राप्रपा) नेपालले केन्द्रीय समितिको बैठक बोलाएको छ।

अध्यक्ष कमल थापाले पुस १५ गते केन्द्रीय समितिको बैठक बोलाएको महामन्त्री राजाराम बर्तौलाले बताउनुभयो। उहाँका अनुसार, पुस १५ गते दिउँसो १ बजे सुकेधारास्थित नवदुर्गा पार्टी प्यालेसमा केन्द्रीय समितिको बैठक बस्नेछ।

राप्रपासँग हुने एकता घोषणा सभाका विषयमा छलफल गर्न केन्द्रीय समितिको बैठक बोलाइएको महामन्त्री बर्तौलाले बताउनुभयो। राप्रपा र राप्रपा नेपालबीच पुस १६ गते एकता घोषणा हुँदैछ।

राप्रपा अध्यक्ष राजेन्द्र लिङदेन र राप्रपा नेपालका अध्यक्ष थापाबीच दुवै पार्टीबीच एकीकरण गर्ने सहमति भइसकेको छ। दुवै अध्यक्षले बुधबार सहमति पत्रमा हस्ताक्षर गर्नुभएको छ।