निर्वाचनको मिति घोषणा भइसकेपछि विधि र प्रविधि परिवर्तन गर्न ठूलो दबाब आयो : निर्वाचन आयोग

काठमाडौं। निर्वाचनको मिति घोषणा भइसकेपछि विधि र प्रविधि परिवर्तन गर्नका लागि निकै ठूलो दबाब आएको कार्यवाहक प्रमुख निर्वाचन आयुक्त रामप्रसाद भण्डारीले बताउनुभएको छ।

मंगलबार मुख्य निर्वाचन अधिकृत, निर्वाचन अधिकृत तथा प्रदेश र जिल्लाका निर्वाचन अधिकारी लागि आयोजित अभिमुखीकरण कार्यक्रममा बोल्दै कार्यवाहक प्रमुख निर्वाचन आयुक्त भण्डारीले यस्तो गुनासो गर्नुभएको छ। ‘निर्वाचन घोषणा भइसकेपछि विधि र प्रविधि परिवर्तन गरेर निर्वाचन गर्नुपर्छ भनेर हामी निकै ठूलो पेलानमा पर्‍यौं,’ भण्डारीले भन्नुभएको छ।

निर्वाचनको मिति घोषणा भइसकेपछि विधि र प्रविधि परिवर्तन गर्न नमिल्ने उहाँको भनाइ थियो। ‘निर्वाचनको मिति घोषणा भइसकेपछि विधि र प्रविधि परिवर्तन गरेर निर्वाचन हुँदैन, यो अन्तराष्ट्रिय निर्वाचन कानुनको मान्यता हो,’ उहाँले भन्नुभयो, ‘निर्वाचनको प्रक्रियामा अन्तराष्ट्रिय पर्यवेक्षकहरूले मान्यता दिएनन् वा दबाब र प्रभावमा भएको निर्वाचन भन्दियो भने हाम्रो निर्वाचनको निष्ठा र हामीले गराएको निर्वाचनको प्रतिफलमा अन्तर्राष्ट्रिय स्तरमा प्रश्न उब्जिन्छ।’

अब निर्वाचनको माहोल बनिसकेको बताउँदै स्वच्छ र निष्पक्ष निर्वाचन गर्नुपर्नेमा उनले जोड दिनुभयो। यसमा निडर भएर काम गर्न उनले आग्रह गरे। ‘कुनै पनि एक दलले अर्को दललाई निषेधको भावनाले हेर्‍यो भने यहाँहरूले तत क्षण नै नियन्त्रण गर्नुहुनेछ भन्ने विश्वास छ,’ भण्डारीले भन्नुभयो।

अहिले निर्वाचनमा आन्तरिक स्रोतबाटै काम भइरहेको बताउनुभयो। ‘सरकारको सोधसाधन र शक्ति हामीसँग छ। अहिले विदेशी कुनै पनि सहायता सहयोग हामीलाई छैन। अहिले मुलुकभित्रकै जे जस्तो हाम्रो स्रोत शक्ति छ त्यसैको परिधिभित्र रहेर हामी निर्वाचन गराउँदै छौं,’ भण्डारले भन्नुभयो।

उहाँले मिस इन्फर्मेसन, डिसइन्फर्मेसन र हेट स्पिच एकदम टड्कारो र जलन्त समस्या रहेको बताउनुभयो। यसलाई नियन्त्रण गर्ने प्रयास भइरहेको उहाँको भनाइ थियो।