फागुन २१ मै निर्वाचन हुन्छ, मैले त टिकट समेत बाँडेर आइसके : प्रचण्ड

काठमाडौँ। नेपाली कम्युनिष्ट पार्टीका संयोजक पुष्पकमल दाहाल ‘प्रचण्ड’ले आम निर्वाचन घोषित मितिमै हुने भन्दै कसैले आशंका नगर्न नहुने बताउनुभएको छ । शुक्रवार चितवनमा आयोजित पार्टीको कार्यक्रमलाई सम्बोधन गर्दै संयोजक दाहालले यस्तो बताउनुभएको हो । उहाँले मुलुक जटिल र चुनौतिपूर्ण परिस्थितिमा रहेको भन्दै यसको समाधान निर्वाचन एकमात्र विकल्प भएको बताउनुभयो।

संयोजक दाहालले गत भदौ २३ र २४ गतेको जेनजी विद्रोह र विध्वंसपछि देश असाधारण अवस्थाबाट गुज्रिरहेको भएपनि विस्तारै राजनीतिक प्रक्रिया अगाडि बढ्न थालेको बताउनुभयो । उहाँले आफूले बिहीवार काठमाडौंमा प्रत्यक्षतर्फको निर्वाचनको लागि टिकट समेत वितरण गरेर आइसकेको भन्दै निर्वाचन हुने नहुने भन्ने प्रश्नमा अल्झिनुभन्दा राम्रो तयारीका साथ अघि बढ्न अपिल गर्नुभयो ।

उहाँले भन्नुभयो,‘गएको भाद्र २३ र २४ को जेनजी विद्रोह र विध्वंसपछि देश असाधारण जटिल र चुनौतीपूर्ण परिस्थितिमा छ । हामी अहिले निर्वाचनको मुखमा छौँ । यहाँ म र प्रमुख जिल्ला अधिकारी बस्दाबस्दै मानिसहरु सबैले चुनाव हुन्छ र भनेर मानिसहरु ले सोधिरहनुभएको छ । मैले हुन्छ भने । पहिले संविधान सभाको निर्वाचनको बेलमा पनि भोलिको दिनमा निर्वाचन भएको अवस्थासम्म निर्वाचन हुन्छ र भन्नेहरु थिए । अब त चुनाव हुन्छ । समानुपाति सूचि पनि गइसक्यो । प्रत्यक्ष निर्वाचितको मनोनयन गर्ने दिन पनि आइसक्यो । मैले त आफ्नो दलको तर्फबाट हिजोदेखि टिकट बाड्न सुरु पनि गरिसकेँ । हिजो काठमाडौंमा टिकट बाँडेर आएको । सरकारले जे गरिरहेको छ, राजनीति दलहरु पनि अगाडि बढिरहेका छन् र जनता पनि चुनावी मानसिकतातिर अगाडि बढिसकेको हुनाले चुनाव हुन्छ । म तपाईहरुलाई पनि चुनाव हुन्छ कि हुन्न भन्ने प्रश्न मनमा ल्याउनुभन्दा चुनावको राम्रो तयारीका साथ अगाडि बढ्न अपिल गर्न चाहान्छु । चुनाव हुनैपर्छ, अर्को कुनै विकल्प छैन ।’

मुलुक, संविधान र व्यवस्थाको रक्षाका लागि आफूहरुले ठुलो संघर्ष गर्नुपरेको स्मरण गदै उहाँले निर्वाचनलाई स्वच्छ र भयरहित वातावरणमा सम्पन्न गर्न आवश्यक सहयोग गर्न समेत अपिल गर्नुभयो । –न्युज एजेन्सी नेपाल