ओलीलाई योगेशको सन्देश– ताप्लेजुङमा किचलो गर्दिनँ, १० क्षेत्रका उमेदवार मिलाउनुस्

काठमाडौं । नेकपा एमालेका उपमहासचिव योगेश भट्टराईले १० निर्वाचन क्षेत्रका उमेदवार मिलाउन पार्टी नेतृत्वलाई आग्रह गर्नुभएको छ। एमालेको उमेदवार सूची सार्वजनिक गरिएपछि पार्टी कमजोर हुने आशंका पैदा भएको भन्दै उहाँले कम्तीमा १० निर्वाचन क्षेत्रमा हेरफेर गर्न अध्यक्ष केपी शर्मा ओलीलाई आग्रह गर्नुभएको छ।

“पार्टीले उमेदवारको सूची सार्वजनिक गरेसँगै केही क्षेत्रमा न्याय नभएको गुनासो आएको छ । पार्टी कमजोर हुने आशंका पैदा भएको छ । अध्यक्ष नै हाम्रो सम्मानित नेता हो,” उहाँले सोमबार भिडियो सन्देशमार्फत भन्नुभएको छ, “महाधिवेशनमा कसले सहयोग गर्‍यो वा गरेन भनेर होइन, विशाल छाती बनाउनुस् । कम्तीमा १० निर्वाचन क्षेत्रका उमेदवार मनोनयन दर्ताअघिसम्म सच्याउनुस् ।’’

ताप्लेजुङमा आफ्नो इच्छा हुँदाहुँदै अध्यक्षले अर्के निर्णय गरेको र त्यसमा किचलो नगर्ने भट्टराईको भनाइ छ । “अध्यक्षले निर्णय गरेपछि उमेदवार जिताउनु मेरो कर्तव्य हुनेछ । म ताप्लेजुङमा किचलो गर्ने छैन,’’ उहाँले भन्नुभयो।

सूर्य चिह्नबाट उमेदवार बन्न लागेका सबैलाई जिताउन क्रियाशील हुन पनि उनले कार्यकर्तालाई अपिल गरेका छन् ।
“न्याय भएन भन्ने गुनासो आएएको छ । कमजोर हुने आशंका पैदा भएको छ । कमरेड अध्यक्ष तपाइँ नेता हो, सम्मानित नेता हो । विशाल छाती बनाउनुस्,” उहाँले भन्नुभएको छ, “महाधिवेशनमा मलाई सहयोग गर्‍योरगरेन भनेर उभिनुहुने छैन ।”