उत्तर भारतमा सडक दुर्घटना हुँदा ६ जनाको मृत्यु

भारतको उत्तरी राज्य उत्तर प्रदेशमा भएको सडक दुर्घटनामा ६ जनाको मृत्यु भएको छ । अन्य केही व्यक्ति घाइते भएका छन् । स्थानीय प्रहरी अधिकारीकाअनुसार नयाँ दिल्ली र उत्तर प्रदेशलाई जोड्ने यमुना एक्सप्रेस–वे अन्तर्गत मथुरा जिल्लामा उक्त दुर्घटना भएको हो । निजी बसमा यात्रा गरिरहेका यात्रुहरू बसबाट ओर्लिएर सडक किनारमा उभिरहेका बेला एउटा तिब्र गतिको भारी सवारी साधनले उनीहरूलाई ठक्कर दिएको थियो ।

उक्त बस नयाँ दिल्लीबाट उत्तर प्रदेशको कानपुरतर्फ जाँदै गरेको बताइएको छ । यात्राका क्रममा केही यात्रुहरूले शौच गर्नका लागि बस रोक्न आग्रह गरेपछि चालकले बस रोकेका थिए र केही यात्रुहरू बाहिर निस्किएका थिए । सोही समयमा अचानक आएको एउटा अनियन्त्रित भारी सवारी साधनले शुरुमा रोकिएर राखेको बसलाई ठक्कर दियो र लगत्तै सडक किनारमा रहेका यात्रुहरूलाई किच्न पुग्यो ।

प्रहरीकाअनुसार ६ जनाको घटनास्थलमै मृत्यु भएको छ भने घाइतेहरूलाई तत्काल उद्धार गरी स्थानीय अस्पतालमा भर्ना गरिएको छ ।