मुलुकबाहिर रहेका ९० लाख नेपाली नागरिकसहित लगानी भित्र्याउन विशेष नीति लागू गर्छौंः काँग्रेस सहमहामन्त्री राणा

काठमाडौँ। नेपाली काँग्रेसका सहमहामन्त्री उदय शमशेर राणाले राजनीतिक र नीतिगत स्थीरता बिना मुलुकको अर्थतन्त्रलाई चलायमान बनाउन नसकिने बताउनुभएको छ ।
पार्टीको तर्फबाट ललितपुर क्षेत्र नं १ को प्रतिनिधि सभा सदस्य उम्मेदवार समेत रहनुभएका उहाँले यस्तो बताउनुभएको हो ।

उहाँले निर्वाचनपछि आफ्नो पार्टीको सरकार बनेको खण्डमा मुलुकको अर्थतन्त्र चलायमान बनाउन नीतिगत स्थीरता दिने प्रतिवद्धता व्यक्त गर्नुभयो । उहाँले नेपालका बैंकहरुमा तरलता भएपनि सर्वसाधारणले सहज रूपमा ऋण पाउने अवस्था नरहेको उल्लेख गर्नुभयो । उहाँले लगानीसँगै मुलुकबाहिर रहेका ९० लाख नागरिकलाई स्वदेश फर्काउन पार्टीले विशेष नीति र कार्यक्रम लागू गर्ने दाबी गर्नुभयो ।

उहाँले भन्नुभयो,‘नेपालको अर्थतन्त्रलाई चलायमान बनाउन मेरो पनि जिम्मेवारी हुन्छ । अहिले पनि ९० लाख नेपाली नागरिक देश बाहिर रहेका छन् । उनीहरुलाई नेपाल फर्काउनको लागि चुट्कि बजाएर हुदैन। हामीले मुलुकको अर्थतन्त्रमा आमुल परिवर्तन गर्नुपर्छ । त्यसको लागि हामीले लगानी पनि नेपालमा ल्याउनुपर्छ र निजी क्षेत्रलाई पनि चलायमान बनाउनुपर्छ । नेपालका बैंकहरुमा पैसा छ तर नेपालीहरुले त्यो पैसाको प्रयोग गर्न पाएका छैनन् । नेपालमा सबैभन्दा ठुलो समस्या भनेको स्थीरताको समस्या हो । एउटा सरकार आउँछ एउटा कुरा लाद्छ । अबको चुनावपछि हामी सरकारमा आएपछि कर संरचना पाँच वर्षसम्म परिवर्तन हुदैन यो नेपाली काँग्रेसको कमिटमेन्ट हो । यति गर्न सकियो भने लगानीकर्ताहरुलाई आफ्नो टाइम स्पेन्ट गर्न पनि पाइन्छ ।’

उहाँले कर संरचनामा स्थिरता कायम गर्नसके लगानीकर्ताले दीर्घकालीन योजना बनाएर काम गर्न सक्ने वातावरण बन्ने समेत जिकिर गर्नुभयो । –न्युज एजेन्सी नेपाल