राष्ट्रियसभाका राम्रा गतिविधि सञ्चारमाध्यममा आएनन् : उपाध्यक्ष घिमिरे

काठमाडौँ। राष्ट्रियसभाकी उपाध्यक्ष विमला घिमिरेले राष्ट्रियसभाका राम्रा गतिविधिलाई सञ्चारमाध्यमले कम प्राथमिकता दिएको भन्दै गुनासो गर्नुभयो।

फागुन २० गतेदेखि बिदा हुन लाग्नुभएकी घिमिरेले संसद्को गरिमा बचाउन र संघीयता कार्यान्वयनमा राष्ट्रियसभाले ऐतिहासिक भूमिका रहेको उल्लेख गर्नुभयो।

उहाँले भन्नुभयो, ‘पत्रकारहरूले चर्का कुरा गर्ने, गाली गर्ने वा संसदीय मर्यादाबाहिर गएर बोलेका कुरालाई मात्र हेडलाइन नबनाउनुहोस्। कसले विषयवस्तुमा रहेर कामको कुरा गरेको छ, त्यसलाई पनि स्थान दिनुहोस्।’

उहाँले राष्ट्रियसभाले विधेयकहरूलाई अड्काएर नराख्ने र सरकारलाई घचघच्याउने काम गरेको दाबी गर्नुभयो।

उहाँले राष्ट्रिय सभाको नियमावलीमा विधेयक ६ महिनाभित्र र प्रतिनिधिसभाबाट आएका विधेयक ६० दिनभित्र टुङ्ग्याउनुपर्ने बाध्यकारी व्यवस्था गरिएको जानकारी दिनुभयो।

महिला सांसदहरूले बोल्दा हुने साना गल्तीलाई लिएर हतोत्साहित नगर्न पनि उहाँले आग्रह गर्नुभयो। राष्ट्रियसभा संघीयताको प्रतीक भएको उहाँको भनाइ छ। महिला, दलित, अपाङ्गता भएका व्यक्ति र विज्ञहरूको प्रतिनिधित्व राष्ट्रियसभामा रहेको बताउनुभयो।