दुर्गम १५ जिल्लाका मतपेटिका हेलिकप्टरबाट ढुवानी गरिँदै

काठमाडौं। निर्वाचन आयोगले भौगोलिक रूपमा दुर्गम रहेका १५ जिल्लाका मतपेटिका हेलिकप्टरमार्फत ढुवानी गर्ने व्यवस्था मिलाएको जनाएको छ।

बिहीबार साँझ आयोजित पत्रकार सम्मेलनमा कार्यवाहक प्रमुख निर्वाचन आयुक्त रामप्रसाद भण्डारीले दुर्गम क्षेत्रबाट मतपेटिका छिटो र सुरक्षित रूपमा संकलन गर्न हवाई साधन प्रयोग गरिएको जानकारी दिनुभयो।

आयोगका अनुसार ताप्लेजुङ, रसुवा, दोलखा, बझाङ र पूर्वी रुकुमका सबै मतपेटिका बिहीबार नै हेलिकप्टरमार्फत सम्बन्धित मतगणना स्थलमा पुर्‍याउने लक्ष्य राखिएको छ।

यस्तै संखुवासभा, सोलुखुम्बु, गोरखा, पश्चिम रुकुम, मनाङ, बाजुरा र हुम्ला लगायत अन्य दुर्गम जिल्लाका मतपेटिका भने शुक्रबार बिहानसम्म सम्बन्धित स्थानमा पुर्‍याइने भण्डारीले बताउनुभयो।

सडक सञ्जालको पहुँच कम तथा भौगोलिक रूपमा विकट क्षेत्रबाट मतपेटिका संकलन भएलगत्तै मतगणना प्रक्रिया अघि बढाइने आयोगले जनाएको छ।

भण्डारीका अनुसार मतदान कार्य समाप्त भएसँगै मतपेटिका सुरक्षित रूपमा संकलन भएपछि निर्देशिका २०८२ अनुसार तुरुन्तै मतगणना सुरु गरिनेछ।