नेविसंघको चेतावनी :- विद्यार्थी संगठन खारेज गरे खरानी हुन्छौँ

काठमाडौँ। नेपाली काँग्रेसको भ्रातृ संगठन नेपाल विद्यार्थी संघ (नेविसंघ)ले विद्यार्थी संगठनहरू खारेज गरे सरकार खरानी हुने चेतावनी दिएको छ। शुक्रवार काठमाडौँमा आयोजित संघको सिनेट बैठकमा बोल्दै अध्यक्ष दुजाङ शेर्पाले उक्त चेतावनी दिनुभएको छ। विद्यार्थी संगठनहरू खारेज गर्ने भनेर मिडिया ट्रायल भइरहेको उहाँले बताउनुभयो।

त्यस्तो गलत काम नयाँ सरकारले गरे आगोको गोलामा हात हाले सरह हुने र त्यसबाट खरानी हुने उहाँले चेतावनी दिनुभयो।

शेर्पाले भन्नुभयो, ‘विद्यार्थी संगठनहरू खारेज गर्ने भनेर मिडिया ट्रायल गरिरहेको हामीले सुनिरहेका छौँ। विद्यार्थीको अधिकारका लागि बोल्छ भनेर नेविसंघलाई सर्वोच्च अदालतले पनि मान्यता दिएको छ। त्यसैले म भन्न चाहन्छु – आगोको गोलामा हात हाल्ने काम नगर्नुहोला। त्यो आगोको ज्वालाले तपाईंहरू भस्म हुनुहुन्छ।’

अध्यक्ष शेर्पाले काँग्रेसभित्रको गुटगत स्वार्थका कारण प्रतिनिधिसभा निर्वाचनमा पराजय व्यहोर्नु परेको तर्क गर्नुभयो।