ओली-लेखक पक्राउ परेमा जेनजी मुभमेन्ट नेपालको स्वागत

काठमाडौं। जेनजी मुभमेन्ट नेपालले जेनजी आन्दोलनका क्रममा भएको दमनमा संलग्न रहेको आरोपमा तत्कालीन प्रधानमन्त्री र गृहमन्त्रीलाई गिरफ्तार गरी कारबाही प्रक्रिया अगाडि बढाउने सरकारको निर्णयलाई स्वागत गरेको छ ।

जेनभी मुभमेन्ट नेपालले शनिबार विज्ञप्ति जारी गरी उक्त घटनामा संलग्न अन्य व्यक्तिलाई पनि कारबाही गर्न माग गरेको हो । ‘उक्त घटनामा संलग्न तत्कालीन गृह प्रशासन तथा सुरक्षा निकायका जिम्मेवार व्यक्तिहरूलाई समेत अविलम्ब पक्राउ गरी निष्पक्ष छानबिन तथा कानूनी कारबाही प्रक्रिया अगाडि बढाउन हामी नेपाल सरकारसँग जोडदार माग गर्दछौं,’ विज्ञप्तिमा भनिएको छ ।

जेनजी मुभमेन्ट नेपालले जेनजी आन्दोलनका दमनकारीलाई बचाउने कुनै पनि प्रकारको षडयन्त्र नहोस् भन्ने चेतावनी पनि दिएको छ । ‘दमनकारीलाई बचाउने प्रयास भएमा देशैभरि युवाहरू सशक्त र कठोर संघर्षमा उत्रिन बाध्य हुनेछन्,’ विज्ञप्तिमा भनिएको छ ।

गौरीबहादुर कार्की आयोगको प्रतिवेदन कार्यान्वयन गर्ने भन्दै सरकारले शनिबार बिहानै पूर्वप्रधानमन्त्री एवं नेकपा एमालेका अध्यक्ष केपी शर्मा ओली र नेपाली कांग्रेसका नेता एवं पूर्वगृहमन्त्री रमेश लेखकलाई पक्राउ गरेको थियो ।