उपत्यका मात्र नेपाल हो भन्ने भास्य नहोस्, घर टहरा नभत्काइयोस् : हर्क साम्पाङ

काठमाडौँ। श्रम संस्कृति पार्टीका अध्यक्ष एवम् प्रतिनिधि सभा सदस्य हर्कराज राईले एक पालिका एक उद्योग र एक घर एक रोजगारी हुनुपर्नेमा जोड दिनुभएको छ । फागुन २१ गतेको चुनावपछि बिहीबार बसेको प्रतिनिधि सभाको पहिलो बैठकलाई सम्बोधन गर्दै उहाँले यस्तो बताउनुभएको हो ।

‘एक पालिका एक उद्योग, एक घरमा एक रोजगार हुनुपर्छ भन्ने हाम्रो माग छ’, सांसद राईले भन्नुभयो ।

उहाँले जनताको सेवा सुविधालाई सार्वजनिक सम्पत्ति प्रयोग गर्न पाउने गरी कानुन बनाउन जोड दिनुभएको छ । उहाँले सरकारको नीति तथा कार्यक्रममा प्राकृतिक संरक्षण, संस्कृतिको संरक्षण, भ्रष्टाचारको अन्त्य, पादर्शी काम गर्न सरकार अगाडि बढ्नुपर्नेमा जोड दिनुभयो ।

देशको शान्ति सुरक्षाका लागि आवश्यक उपाय अपनाउन र अत्यावश्यक कामलाई प्राथमिकता दिन उहाँले जोड दिनुभएको छ ।

अनुसन्धान नगरी सरकारले ल्याएका कामलाई अगाडि बढाउनु नहुने उहाँको भनाइ छ । सांसद राईले वृद्धभत्ता, ब्रिज कोर्श जस्ता सवालमाथि सरकारले गरेका निर्णमा विचार गर्न सरकारलाई सुझाव दिनुभएको छ ।

सांसद राईले सुकुम्बासी भन्दै जनताका घर टहरा भत्काउनु नहुने, भूमिहीन र सुकुम्बासीलाई लाजपूर्जा दिनुपर्नेमा जोड दिनुभयो । धनी मात्र नभएर गरिबको पनि हो यो देश भन्ने आवास जनातामा हुनुपर्ने बताउनुभयो ।

काठमाडौँ उपत्यका मात्र नेपाल हो भन्ने सोच राख्नु नहुनेमा उहाँले जोड दिनुभएको छ । भूपू गोर्खा सैनिकको समान तलबका लागि नेपाल सरकारले पहल गर्नुपर्नेमा उहाँको जोड छ ।