प्रदीप खड्का अभिनीत ‘एक्टर’को मिल्यो विवाद, भोलिदेखि हलमा जाने

काठमाडौँ। प्रदीप खड्का अभिनीत फिल्म ‘एक्टर स् टेक वन’को कपी राइट विवाद मिलेपछि अब शुक्रबारबाट हलमा आउने भएको छ। यसअघि ‘एक्टर’ को टिमले विवाद अदालत पुगेपछि प्रदर्शन स्थगित भएको थियो।

बिहीबार काठमाडौँमा पत्रकार सम्मेलन गर्दै फिल्म ‘एक्टर स् टेक वन’ निर्माण टिमले शुक्रबारदेखि प्रदर्शनमा आउने जानकारी दिएको हो। यही माघ १६ गतेदेखि रिलिज हुने भनिएको चलचित्र ‘एक्टरः टेक वन’विरुद्ध काठमाडौँ जिल्ला अदालतमा मुद्दा परेपछि रोकिएको थियो।

काठमाडौँ जिल्ला अदालतले फिल्म ‘एक्टर स् टेक वन’को प्रदर्शन तत्काल नगर्नू भनि अन्तरकालीन आदेश जारी गरेको थियो। तर नेपाली डायस्पोरा ईन्टरटेनमेन्टस प्रालिका सम्राट थापा,अदृत फिल्मस् प्रालिका थमनकुमार भण्डारी र मोती फिल्म प्रालिका मोती कार्कीले संयुक्त विज्ञप्ति जारी गर्दै काठमाडौँ जिल्ला अदालतमा रहेको मुद्दा पनि फिर्ता लिने सहमति भएको जनाए ।

राजन भुसालद्वारा निर्देशित चलचित्रमा प्रदिप खड्का, आना शर्मा, दिव्या रायमाझी, राजबल्लभ कोइराला, दिव्य देव, सृजना अधिकारी, उषा रजक, सुशील सिटौलालगायतका कलाकारहरूको अभिनय छ ।

अधृत फिल्म्स् र अ मोती फिल्मको संयुक्त प्रस्तुति रहेको चलचित्रमा निर्माता थमन कुमार भण्डारी, क्रियटिभ प्रोड्युसर मोती कार्की र सह–निर्माता अनीश भुसाल रहेका छन् ।