पर्सा जिल्ला अदालतको मुद्दामा अब रविले वारेसमार्फत हाजिरी जनाए पुग्ने

काठमाडौं । राष्ट्रिय स्वतन्त्र पार्टी (रास्वपा) का सभापति रवि लामिछानेले पर्सा जिल्ला अदालतमा चलेको मुद्दाको प्रतिनिधिका रूपमा ‘वारिस’ राख्ने अनुमति पाउनुभएको छ।

जिल्ला न्यायाधीश सुमन कुमार न्यौपानेको इजलासबाट बिहीबार (चैत १९) मुद्दामा वारिसको अनुमति दिएको तहसिलदार देवराज भट्टराईले जानकारी दिनुभयो।

“रास्वपा सभापति लामिछानेले पर्सामा चलेको मुद्दामा वारिस राख्न अनुमति पाउनुभयो । अब उहाँ आफैँ तारिखमा आइरहनु परेन,’’ अदालतका तहसिलदार भट्टराईले भन्नुुभयो।

भट्टराईका अनुसार लामिछानेले बुधबार (चैत १८) गते ‘वारिस नियुक्त गर्न अनुमति पाउँ’ भन्दै अदालतमा निवेदन दिनुभएको छ। लामिछानेविरुद्ध पर्सा अदालतमा ‘सहकारी ठगी र संगठित अपराध’ मुद्दा विचाराधीन छ ।

लामिछानेले बुधबारै पर्सा जिल्ला अदालत पुगेर तारेख बुझ्नुभएको छ। उहाँको मुद्दामा अर्को पेसी तारेख ०८३ वैशाख २४ गतेका लागि तोकिएको छ । रास्वपा सभापति लामिछाने चितवन–२ बाट प्रतिनिधिसभामा निर्वाचित हुनुभएको छ।