सगरमाथाको चुचुरोमा अनेरास्ववियुको झन्डा

काठमाडौँ। अनेरास्ववियुको २४ औँ राष्ट्रिय महाधिवेशनको लोगो र संगठनको झन्डा विश्वकै सर्वोच्च शिखर सगरमाथाको चुचुरोमा फहराइएको छ।

हिमाल आरोही मिग्मा डेभिड शेर्पाको नेतृत्वको टोलीले गत जेठ ५ गते बिहान ८ बजे सगरमाथाको शिखरमा अनेरास्ववियुको झन्डा र महाधिवेशनको लोगो पुर्‍याएका हुन्।

संगठनले यो अभियान जलवायु परिवर्तनविरुद्धको सचेतना तथा हिमाल संरक्षणको सन्देश फैलाउने उद्देश्यका साथ सञ्चालन गरेको अखिलका प्रवक्ता एवं सचिव प्रकाश पौडेलले जानकारी दिए।

अनेरास्ववियुले भविष्यमा पनि जलवायु परिवर्तन र प्राकृतिक सम्पदाको संरक्षणका लागि विद्यार्थीहरूको अमूल्य योगदान सुनिश्चित गर्न निरन्तर क्रियाशील रहने प्रतिवद्धता जनाएको छ।