एमालेलाई समाप्त पार्न माओवादीले आक्रमण गरिरहेको छ ; शंकर पोखरेल

काठमाडौं। नेकपा एमालेका महासचिव शंकर पोखरेलले एमाले र पार्टी नेतृत्वलाई समाप्त पार्न नेकपा माओवादी केन्द्रले आक्रमण गरिरहेको आरोप लगाएका छन्।

कास्कीमा राष्ट्रिय युवा संघ नेपालको १० औँ राष्ट्रिय महाधिवेशन उद्घाटन गर्दै उनले यस्तो चेतावनी दिएका छन्। उनले नेकपा एमाले पार्टी र पार्टीको नेतृत्वमा हमला गर्ने काम माओवादीले गरिरहेको बताए।

उनले उनीहरूको उद्देश्य नै नेकपा एमालेलाई कमजोर र समाप्त पार्नु रहेको बताए। अहिलेको सरकारले बिग्रिएको नेपालको अर्थतन्त्र सुधार गरिरहेको दाबी गरे।

पोखरेलले भने, ‘हाम्रो पार्टी र हाम्रो पार्टी नेतृत्वविरुद्ध हमला‚ घेराबन्दी र आक्रमण भइरहेको छ। विरोधीहरूले जुन हिसाबले विरोध गरिरहेका छन्। त्यो आलोचनाको उद्देश्य नेकपा एमालेलाई कमजोर र समाप्त पार्ने रहेको छ। सबैभन्दा धेरै हाम्रो पार्टी र हाम्रो पार्टीका नेतृत्वविरुद्ध नेकपा माओवादी र तिनका कार्यकर्ताहरू अत्यन्त आक्रामक रूपमा प्रस्तुत भइरहेको पाउँछौँ।’

महासचिव पोखरेलले नेकपा एमालेको नेतृत्वको सरकार र नेकपा एमालेबाट कुनै गलत काम नभएको दाबी गरे।