ट्रकको ठक्करबाट मोटरसाइकल चालकको मृत्यु

काठमाडौँ । त्रिभुवन राजपथस्थित धादिङको धुनिवेशी नगरपालिका–७ मा भारतीय नम्बरको ट्रकको ठक्करबाट मोटरसाइकल चालकको मृत्यु भएको छ । मृत्यु हुनेमा ध.२प. ३१४६ नम्बरको मोटरसाइकल चालक करिब ४२ वर्षीय पुरुष छन् ।

उनको परिचय खुलेको छैन। बुधवार मध्यान्ह धुनिवेशीस्थित नौबिसेमा चितवनबाट काठमाडौँ जाँदै गरेको मोटरसाइकललाई विपरीत दिशाबाट आएको युपी–५१ सिटी–२६०१ नम्बरको ट्रकले ठक्कर दिएको राजमार्ग सुरक्षा तथा ट्राफिक व्यवस्थापन कार्यालय चितवनका एसपी नरेश सुवेदीले रातोपाटीलाई बताए ।

ट्रक अनियन्त्रित भएर सडकबाट करिब २५ मिटर तल खसेको छ । दुर्घटनामा ५ जना घाइते भएका छन् । घाइते हुनेमा मोटरसाइकल पछाडि सवार एक जना, ट्रक चालक २५ वर्षीय भारतीय नागरिक ईसाद आलम, ट्रकमा सवार जावी अन्सारी, उस्मान अन्सारी र ओस्लिम आलम छन् ।

मोटरसाइकल चालकको दुर्घटनापछि उपचारको क्रममा काठमाडौँको ट्रमा सेन्टरमा मृत्यु भएको हो ।