मधेशको कार्यवाहक मुख्यमन्त्रीमा सराेज यादव

काठमाडौं । मधेश प्रदेशको कार्यवाहक मुख्यमन्त्रीको जिम्मेवारी भौतिक पूर्वाधारमन्त्री सरोजकुमार यादवलाई दिइएको छ ।

मुख्यमन्त्री सतिशकुमार सिंह एक साताको मलेसिया भ्रमणका लागि आज त्यसतर्फ प्रस्थान गर्दै छन् । सिंहको अनुपस्थितिमा मन्त्री यादवलाई कार्यवाहक मुख्यमन्त्रीको जिम्मेवारी तोकिएको हो । उनी नेकपा (एमाले)का मधेश प्रदेशका संसदीय दलका नेतासमेत हुन् ।

मुख्यमन्त्री तथा मन्त्रिपरिषद्को कार्यालयले मधेश प्रदेश सरकार (कार्यसम्पादन) नियमावली, २०८० को नियम १४ को उपनियम (३) बमोजिम यादवलाई कार्यवाहक मुख्यमन्त्रीको जिम्मेवारी दिएको पत्रमार्फत् जानकारी गराएको छ ।