कैलाली कारागारमा एक थुनुवाको मृत्यु

कैलाली। कैलाली कारागारमा एक थुनुवाको मृत्यु भएको छ । कारागारमा रहेका कैलालीको टीकापुर नगरपालिका– ४ का ५६ वर्षीय रामकिसन चौधरीको मृत्यु भएको हो ।

जिल्ला प्रहरी कार्यालय कैलालीका प्रहरी नायब उपरीक्षक राजकुमार सिंहका अनुसार स्वास्थ्यमा समस्या भएपछि चौधरीलाई २ बजे सेती प्रादेशिक अस्पताल पुर्‍याइको थियो । अस्पताल पुर्‍याएको २० मिनेटमै चिकित्सकले चौधरीलाई मृत घोषणा गरेको डीएसपी सिंहले बताए ।

चौधरीलाई २९ साउनमा जबरजस्तीकरणी मुद्दामा पुर्पक्षका लागि कारागार चलान गरिएको थियो । पछिल्लो दुई महिनाको अवधिमा कैलाली कारागारका तीन जना कैदीबन्दीको मृत्यु भइसकेको छ ।

बैंकिङ कसुरमा दोषी ठहर भएर कैलाली कारागारमा सजाय भुक्तान गरिरहेका डडेल्धुराको भागेश्वर गाउँपालिका– ५ का २८ वर्षीय हरिसिंह पालीको २ असारमा मृत्यु भएको थियो ।

२३ साउनमा भएको हिंसात्मक झडपमा धनगढी उपमहानगरपालिका– ४ का भरत चौधरीको मृत्यु भएको थियो ।