जनार्दनद्वारा फेरि पनि प्रचण्डको राजीनामा माग

काठमाडौं। नेकपा (माओवादी केन्द्र) का उपमहासचिव जनार्दन शर्माले पार्टी अध्यक्ष पुष्पकमल दाहाल ‘प्रचण्ड’ को राजीनामा माग्नु भएको छ । जेन–जी आन्दोलनको संश्लेषण र आगामी रणनीतिबारे आफ्नो १६ बुँदे प्रस्ताव राख्दै उहाँले भन्नुभएको छ, ‘पार्टीको मूल नेतृत्वले तत्काल राजीनामा दिनुपर्छ।’

त्यस्तै उहाँले जेन–जी आन्दोलनले थिग्रिएको भ्रष्टाचारयुक्त राजनीति, संस्कृतिमाथि प्रहार गरेको भन्दै त्यसको सकारात्मक संश्लेषण गरिनुपर्ने धारणा राख्नुभएको छ। यि जेन–जी आन्दोलनले दलतन्त्र, नेतातन्त्र, कमिसनतन्त्र र दलालीका सबै पाटापक्ष उजागर गरेको बताउँदै उनले अब देशलाई नयाँ ढंगले अगाडि बढाउने बाटो खोलेको उल्लेख गर्नुभएको छ।

त्यस्तै, वर्तमान सरकारलाई सहयोग गर्दै निर्वाचनमा जाने वातावरण बनाउनुपर्ने, पार्टीभित्र सम्पत्ति छानबिनबारे विगतदेखि राखेको माग कार्यान्वयन गर्न स्वतन्त्र व्यक्तिको नेतृत्वमा आयोग गठन गर्नुपर्ने, २०४६ पछि पदमा बसेका सबै क्षेत्रका निवृत्तहरूको सम्पत्ति छानबिन र जेन जी आन्दोलनमा जनधनको क्षतिबारे उच्चस्तरीय आयोग बनाउन अहिलेको सरकारसँग माग गर्नुपर्ने उहाँको भनाइ छ ।