जेनजी प्रदर्शनमा हराएको ३०३ राइफल दमकमा फेला

भद्रपुर (झापा)। गत भदौ २४ गतेको ‘जेनजी’ प्रदर्शनका क्रममा हराएको ३०३ राइफल झापाको दमक नगरपालिका–५ धनेश्वर मन्दिरको पूर्वपट्टि गेट नजिक बेवारिसे अवस्थामा फेला परेको छ।

स्थानीयवासीले आज बिहान सो बन्दुक देखेपछि इलाका प्रहरी कार्यालय दमकलाई जानकारी गराएका थिए। जानकारी पाएलगत्तै प्रहरी निरीक्षक नवीन राईको नेतृत्वमा खटिएको टोली घटनास्थल पुगेको थियो।

प्रहरी नायब उपरीक्षक खगेन्द्रबहादुर खड्काका अनुसार फेला परेको हतियार जेनजी प्रदर्शनका क्रममा कार्यालयबाट लुटिएको ३०३ राइफल नै भएको पुष्टि भएको हो। उक्त राइफल म्यागजिनसहित फेला परेको जनाइएको छ।

प्रहरीले आवश्यक कानुनी प्रक्रिया पूरा गरी हतियारलाई इलाका प्रहरी कार्यालय दमकमा सुरक्षित राखिएको जनाएको छ।