एमाले केन्द्रीय कार्यालय भवनको मर्मत सुरु

काठमाडौँ। नेकपा एमालेले ललितपुर, च्यासलस्थित केन्द्रीय कार्यालय भवनको मर्मतकार्य सुरु गरेको छ।

गत भदौ २४ गतेको जेनजी प्रदर्शनका क्रममा आगलागी र तोडफोड भएपछि छानो र पर्खालको मर्मत तथा रङ्गरोगनको काम जारी छ। एमाले केन्द्रीय कार्यालयका सचिव डा भीष्म अधिकारीका अनुसार इन्जिनियरको प्रतिवेदनमा भवन प्रबलीकरणयोग्य भएको पुष्टि भएपछि मर्मत सुरु गरिएको हो।

एमालेले आगलागी र क्षति भएपछि यही कात्तिक ८ गतेदेखि पाल टाँगेर अस्थायी कार्यालय सञ्चालन गर्दै आएको थियो। जेनजी आन्दोलनका क्रममा देशभर ६४ पार्टी कार्यालय र १५८ भन्दा बढी नेता–कार्यकर्ताका निजी घर तथा व्यवसाय प्रभावित भएका थिए। रासस